Bengaluru, Jylliew:
Ka seng BJP ha ka Lah Sngi U Blei ka la pynlong ïa ki jingïakhih ha kylleng ki jaka jong ka jylla Karnataka ban pyrshah halor ka jingkiewdor jong ka Petrol bad ka Diesel. Kum shi bynta ban kynthoh jur ïa ka sorkar Congress ha ka jylla, ka seng BJP ka la maham tyngeh ba ka seng kan sa pynlong da ki jingïakhih ba khlem buh por haduh ba ka sorkar kan pynhiar noh ïa ka dor jong kine ki umphniang kali.
Ha Bengaluru, ki nongïalam jong ka seng BJP ki la shahkem ha ki pulit da kumba katto katne por. Ki nongïalam jong ka seng BJP ki la leh mynleh leit rah kum ki metïap ïa ki kali kum ka dak ban pyni halor ka jingpyrshah ïa ka jingkiew dor ka umphiang kali.
Ha ki katto katne tylli ki jaka, ki briew ki la ñiat ïa ki kali arshaka halor kajuh ka jingpyrshah. Kum ka jingong ba kane ka jingpynkiewdor ïa ka umphniang kali ka long ka dak jong ka jingpyrshah ïa ki paidbah, u President jong ka seng BJP ha Karnataka, u BY Vijayendra, u la ong ba ka seng kan sa bteng ïa ka jingïakhih haduh ban da la pynhiar ïa ki dor jong ki umphniang kali.
U la ong ba ka rai jong ka sorkar Congress ha ka ban pynkiew ïa ka umphniang kali hadien ba la ïaid lait na ki jingbuh jingkular bad pynhiar ïa ki dor jong ki marbam ka long ka bym lah ban pdiang. “Kane ka jingpyntreikam ka long kum ka jingshet kylla bad ka jingktah ïa ka jingsngew jong ki paidbah, ha kaba kane kam don jingpher na ka jing-leh thok,” la ong u Vijayendra.
