New Delhi, Jylliew:
Ka Myntri ba dei khmih halor ka umbam-umdih ka Atishi ha ka Lah Sngi U Blei ka la leit jurip bniah ïa ka Wazirabad Barrage bad buh ka jingkyrpad ïa ka sorkar Haryana ba kan pyllait um na ka wah Yamuna. Ka Atishi ka la ong ba ka Wazirabad Barrage ka la ïoh um na Haryana bad leit tuid sha ka jaka pynkhuid um kaba don ha Chandrawal, Okhla bad Wazirabad.
“Lada ym ïoh um, ha kano ka rukom kine ki jaka pynkhuid um kin treikam? Ngi buh ka jingkyrpad ïa ka Haryana bad ong ba ki briew ha Delhi ki dap mynta da ka jingkhuslai bad ki la dei ban pyllait ïa ka um na ka wah Yamuna,” ka la bynrap.
U MP jong ka seng AAP u Sanjay Singh u la pynshisha da kaba ong ba ka jingkyrduh um ka la long ka daw ba la wanrah da ka seng BJP.
U Singh u la kynnoh ba ka seng BJP ka la ïasuhbuit sniew bad ki nongshong shnong jong ka nongbah.
Kam shym la don kano kano ka jingpyntreikam ka ban ïaid shakhmat na ka liang ka seng BJP ha kaba ïadei bad kane ka jingpynshisha.
“Nga la ong ba ki la don ki jingpyntreikam na ka liang ka seng BJP ban wanrah ïa ka jingkyrduh um ha Delhi. Ka seng BJP ka la kwah ba nym pynïoh um na ka bynta ki briew jong ka Delhi bad ki la ïasuhbuit sniew ha ka bynta ban leh ïa kine baroh,” la pynshisha u Singh.
Ka rukom sam um kan sa shah ktah jur ha ki bynta jong ka Lutyens kaba don ha Delhi, la ong ki heh jong ka NDMC.
“Kumba la ai jingtip da u DJB la ong ba ka jingpynmih ïa ka umbam-umdih kaba bit na ka Wazirabad Water Plant ym shym la lah ban pynmih bun namar ka jingbym wan ka um kaba dei ban pynkhuid, namar kane ka daw ka jingpynpoi um ha ka thaiñ Tilak Marg Underground Water Reservoir (UGR) bad Bengali Market UGR yn sa lah ban phah tang shisien shi sngi, ha kaba kane kan sa long ha ka por mynstep,” la ong u heh ba dei khmih.
