New Delhi, Jylliew:
Ka kynhun myntri jong ka Sorkar Pdeng ba la lam khmat da u Myntri Rangbahduh ka ri, u Narendra Modi hynnin ka sngi ka la ai jingmynjur haba iadei bad ka jingtei ia ka kad kaba heh ha Vadhavan hajan Dahanuha Maharastra. Ia kane ka projek yn tei da ka Vadhavan Port Project Limited (VPPL), ka SPV ba la seng da ka Jawaharlal Nehru Port Authority (JNPA) bad ka Maharashtra Maritime Board (MMB) ha kaba ka jingbat share kan long 74% bad 26%.
Ia ka kad Vadhavan yn shna ha ka rukom ba lah ban pyndonkam ha ka jinglong ba kumno kumno ka suin bneng ha Vadhavan, Palghar District, Maharashtra.Ka jinglut jingsep ba kynthup ia ka jingsiew bai shim jaka ka long T.76,220klur.
Kane kan kynthup ia ka jingtei ia ki jingdon jingem ba kongsan, ki terminal bad kiwei kiwei ki jingdonkam ban pyniaid iew bad yn trei ha ka rukom treikam public-private partnership (PPP). Ka kynhun myntri ka la mynjur ruh ia ka jingtei ia ka surok hapdeng ka kad bad ki surok bah da ka tnat Road Transport & Highways bad ka jingpyniasoh bad ki lynti rel bad ruh ka Dedicated Rail Freight Corridor ka ban wan da ka tnat kam rel.Kane ka kad kan don 9 tylli ki container terminal, kiba mar 1000 meter, saw tylli ki multipurpose berth, ba kynthup ka coastal berth, saw tylli ki liquid cargo berth, ka Ro-Ro berth, bad ka Coast Guard berth. Kane ka projek ka kynthup ia ka jingshim haduh 1,448 hectare ka jaka ha ka duriaw bad ka jingtei ia ka offshore break water kaba10.14 km bad ki jaka buh mar.
Kane ka projek kan pynbiang ka bor treikam kaba298 million metric ton (MMT) ha ka shi snem, ba kynthup kumba 23.2 million TEU (Twenty-foot equivalent) jong ka jinglah treikam ha kaba iadei bad ki container.Kane kan iarap ruh ia ka jingiaid ka khaii pateng EXIM lyngba ka IMEEC (India Middle East Europe Economic Corridor) bad ka INSTC (International North South Transportation Corridor).
Ki jingdon jingem kiba bha ha ki kam ba iadei bad ki duriaw ki kyntiew ia ki jingtreikam public-private partnership (PPP) bad ki pyndonkam ia ki bor treikam bad ki teknoloji ban tei ia ki terminal katkum ka juk mynta kiba lah ban trei ia ki kam kiba iadei bad ki jhad kiba heh kiba iaid lyngba ka Thain Mihngi jong ka Pyrthei, Europe, ka Middle East, Africa bad America. Ynda la dep tei ia ka, ka kad Vadhavan Port kan long kawei na ki 10 tylli ki kad kiba biang tam ha ka pyrthei.
Kane ka projek kaba iahap bad ka prokram PM Gati Shakti, kan plié lad shuh shuh na ka bynta ki kam ka ioh ka kot bad ka plié lad ioh kam ioh jam ruh ia kumba 10 lak ngut ki briew bad lyngba kane, kan iarap bha ia ka ioh ka kot ha kane ka jaka.
