Srinagar, Jylliew:
U Myntri Rangbahduh u Narendra Modi hynnin ka sngi u la lamkhmat ïa ka ri na ka bynta ban rakhe ïa ka International Day of Yoga (IYD) ha ka sien kaba 10 da kaba ïashim bynta ha ka lympung leh Yoga ha ka nongbah Srinagar jong ka Jammu & Kashmir.
Ha ka jingai jingkren ha kane ka sngi, u Myntri Rangbahduh u la pynpaw ka jingkmen kaba khraw ban ïohlad ban don ha Jammu & Kashmir, ha ka jingrakhe ïa ka International Day of Yoga.
“Ka jingdon jingsngew, ka jingïohbor ka met bad ka jingïohmad jingmyntoi na ka Yoga ka la long hangne mynta ka sngi,” la ong u Modi.
U la ai khublei ha kane ka sngi rakhe ïa ka International Day of Yoga sha baroh ki nongshong shnong kiba don ha kylleng ki ri jong ka pyrthei.
Ha kaba ïadei bad ka jingrakhe ïa ka International Yoga Day kaba 10, u Myntri Rangbahduh u la pynkynmaw ïa ki jingïohnam ha ki 177 tylli ki ri kaba la ailad ïa ka jingtyrwa jong ka India halor kane ha UN.
U la kdew shai ruh halor ki bynta jong ka jingïohnam ha kaba ïadei bad ka IYD kum ha ka jingdon jong 35,000 ngut ki briew kiba la leh Yoga ha Kartavya Path ha u snem 2015 bad palat 130 tylli ki ri kiba la ïashim bynta ha ka Yoga ba la lamkhmat da u Myntri Rangbahduh ha UN Headquarters mynshem snem.
U la pynpaw ruh ka jingkmen kaba khraw ba ki la don palat 100 ki jaka pule ha India bad 10 tylli ki jaka pule kiba kham paw kiba shabar ri kiba la shah pynithuh da ka Yoga Certification Board ba la wanrah da ka Ministry of Ayush.
