Thiruvananthapuram:
Ka CPI ka la ong ba kan sa pynïakhun ïa u kyrtong ka seng pyrshah ïa ka Priyanka Gandhi Vadra ha ka ilekshon shiteng samoi jong ka Lok Sabha ha Wayanad.
Ka CPI ka la bat ïa ka Wayanad Lok Sabha konstitwensi ha ka kynhun Left Democratic Front (LDF) bad u kyrtong jong ka un sa ïakhun ha ka ilekshon shiteng samoi, la ong u Secretary jong ka seng CPI ha ka jylla u Binoy Viswam ha ka jingïakren bad ki nongthoh khubor.
“Kaei kaba sngew artatien halor jong ka? Ka seng CPI bad ka kynhun LDF kin ym leh ei ei ka ban ïahap bad ka seng BJP. Kumta ngin sa pynïakhun ïa u kyrtong jong ngi ha ka ilekshon,” u la ong.
Haba la buh jingkylli halor ka jinglong kyrtong jong ka Priyanka, u la ong ka seng Congress ka la laitluid bha ban jied kyrtong ha kano kano ka konstitwensi.
U nongïalam jong ka kynhun Left u la ong ruh ba lada ka dei ka jingthmu jong ka seng Congress ban pyllait ïa ka Wayanad, kam donkam ïa ki ba kin wanrah ïa u nongïalam ba pawkhmat kum u Rahul Gandhi sha ka bynta ba shaphang Shathie.
U heh nongïalam jong ka seng CPI u Annie Raja u la ïakhun pyrshah ïa u Rahul ha ka ilekshon Lok Sabha ba dang shen na Wayanad.
Hadien ba la dep ban pynlong ïa ka jingïalang jong ka kynhun nongïalam ka seng New Delhi, u heh nongïalam jong ka seng Congress u Mallikarjun Kharge u la ong ba u Rahul un sa bat ïa ka Lok Sabha konstitwensi ha Rae Bareli ha Uttar Pradesh bad iehnoh ïa ka Wayanad konstitwensi ha kaba ka para jong u ka Priyanka kan sa ïakhun.
U Rahul u la jop ha baroh ar kata ha Wayanad bad Rae Bareli konstitwensi bad u la dei ban iehnoh ïa kawei na kine ki konstitwensi hapoh ki 14 sngi naduh ba la dep ban ñiew ïa ki vote jong ka Lok Sabha ilekshon ha ka 4 tarik, Jylliew.
