New Delhi, Jylliew:
Ka la don ka jingmudui mukotduma ba la pynngat pyrshah ïa ar ngut ki nonghikai skul ha Maharashtra halor ka jingshah kynnoh ba ki la donkti ban jingpyllait tuh ïa ki jingkylli jong ka eksam NEET. Ïa ka jingmudui ejahar la buh ha Latur kaba don Maharashtra’s Latur. Ïa u Sanjay Tukaram Jadhav bad u Jalil Umarkhan Pathan la rah da ka kynhun Nanded Anti-Terrorist Squad (ATS) ha ka sngi U Blei.
Kine ki nonghikai ki ju hikai ha ki skul Zilla Parishad bad pynïaid ruh ïa ki Coaching Centres ki riewshimet ha Latur. Ïa u Jalil Umarkhan Pathan la rah ha ka Sngi U Blei sha patok na ka bynta ban kylli jingkylli, katba ïa u Sanjay Tukaram Jadhav haduh ba la thoh ïa ka khubor ki pulit ki dang pynlong ïa ka jingleit thwet.
Kum ka sakhi halor ka jingdonkti jong ki, ki pulit ki la lap ïa ki Admit Card bad ki WhatsApp Chat jong kiba bun ki khynnah ha ki phone jong ki. Kine baroh ar ngut ki la ju ïakren borabor bad u briew uba ha ka nongbah Delhi. U briew ïa uba la tip kyrteng kum u Gangadhar na Delhi u ju ïarap ïa u Sanjay Tukaram Jadhav bad u Jalil Umarkhan Pathan ban ïakren bad ki nongïaleh eksam kiba lah ban siew pisa na ka bynta ki jingkylli kiba dei ban thoh khnang ba kin lah ban thoh bha ïa ka eksam.
