Phla uba shahkem halor ka kam bamsap na ka NEET ïa ki rukom pyntreikam baroh

New Delhi, Jylliew:

Ha ka por ba ka jingtohkit halor ka kam bamsap kaba la mih na ka jinglait tuh ki jingkylli  NEET ka la ïaid shakhmat, ka kynhun tohkit ka la lap dien ïa u dkhot jong ka kynhun ba lamkhmat ha kane ka kam bamsap, ha kaba u la batai bniah ïa ki rukom pyntreikam halor kane ka jingjia.

U Bijender Gupta kumba la tohkit, u la ong ba u la don bynta ha kiba bun ki jingjia jong ki jingpyllait tuh ïa ki jingkylli ha ki por ba la leit ruh, bad u la shah kem la arsien hynrei u la shah pyllait noh na kti jong ki pulit.

Ka durkhih jong u kaba dei naduh u bnai Lber ka la ïathuh lypa ba kan sa don ka jinglait tuh jong ki jingkylli ka NEET-UG ha kaba kane ka la saphriang kylleng.

U Gupta u la donkti ha ka kam bamsap lyngba ka jinglait tuh jong ki jingkylli jong ka Odisha Staff Selection Commission (OSSC) 2024, ka jinglait tuh jingkylli jong ka Bihar Public Service Commission bad Madhya Pradesh Public Service Commission.

Da ka jingdon jong ka kynhun kaba la treikam da kumba 24 snem ha kaba ïadei bad ka jinglait tuh jong ki jingkylli, u Bijender Gupta u la phla ba u la leh ïa kane ka kam sniew jong u kum ka lad kamai pisa.

U la ïathuh ruh ba ka jingthmu ha kaba ïadei bad ka jingpyllait tuh ïa ki jingkylli ha ka NEET-UG ka la long na ka bynta ki 700 ngut ki nongïaleh eksam bad la antad ba kane ka jingklop pisa kan kot sha ka `. 200-300 klur. Ha ka jingïathuh ka tyllong khubor, la ong ba u Bijender Gupta u la batai shai kumno ki synduk ki la lait ha ka por ba la kit ïa ki jingkylli.

U la ithuh bha ïa u snar nongïalam ha ka kam bamsap kaba la mih na ka NEET u Sanjeev Mukhiya, ïa uba mynta u dang shah thwet jur bad ïa u runar uba dang shahkem shen u Vishal Chaurasia.

U Gupta u la batai lut halor ka rukom pyntreikam ha kane ka kam bamsap bad ha kiwei pat kiba u la donkti.

“Ngan leit sha Jail, kata ngan sa lait jamin bad sdang biang ïa ka kam,” la ong u  Bijender Gupta ha ka jingshah tohkit.