Chennai, Jylliew:
Ki nongïalam bad ki dkhot jong ka seng AIADMK ha Chennai ki la pynlong da ka jingïakhih shah thngan hynnin ka sngi ka Sngi Palei ban pyrshah jur ïa ka sorkar DMK hadien ka jingjia sngewsih jong ka jingïap ki briew na ka jingdih ïa ka kyiad ha Kallakurichi, ha kaba ka jingïap jong ki briew haduh mynta ka la kiew sha 63 ngut.
Ki nongïalam jong ka seng AIADMK shuh shuh ki la dawa ba la dei ban phah tohkit ha ka Central Bureau of Investigation (CBI) na ka bynta ban tohkit bniah halor ka jingjia, la ïathuh ka tyllong khubor.
U heh nongïalam jong ka seng AIADMK u C. Ponnaiyan u la ong, “Ki jingdawa jong ngi ki la shah kyntait ha ka sorkar jong u Stalin. Ka jingshim ïa ka rai ban pynshitom tyngeh ïa kiba la donkti ha ka jingjia, ka dei kaba dang pynsah teng da ka sorkar DMK. Kane ka long kum ka jingkyrshan ïa ki nong-leh bymman jong ka sorkar u Stalin…” la ong u nongïalam jong ka seng AIADMK bad u nongïalam jong ka liang pyrshah u Edappadi Palaniswami bad kiwei pat ki heh nongïalam kiba la ïashim bynta ha ka jingïakhih.
Ki dang don bun ngut ki briew kiba la shah sumar ha kiba bun ki hospital hadien ba ki la dih ïa kane ka kyiad ha ka shnong Karunapuram kaba la jia ha ka 18 tarik, Jylliew.
Ka jingkiew jong kiba ïap ha ka jingjia ka la long wat haba ka National Human Rights Commission (NHRC) ka la ïaid shakhmat ban pyntreikam halor ka jingjia, bad phah jingthoh sha u Chief Secretary bad u Director-General of Tamil Nadu Police, halor ka jingdawa ba la dei ban phah ïa ka kaiphot hapoh ka shi taïew.
Ka National Commission for Women (NCW) ruh ka la jam shakhmat ban pyntreikam halor kane ka jingjia naba ki la don kumba 6 ngut ki kynthei kiba la ïap bad thung da ka kynhun jong lai ngut ki dkhot ban khmih bad tohkit bniah halor kane ka jingjia.
Haduh ba la thoh ïa ka khubor la ong ba ka jingïap jong ki briew kan sa nang kiew naba ki dang don bun ngut kiba dang shitom jur.
