New Delhi, Jylliew 28 (UNI)
Kawei ka MP na ka seng Congress, ka Phulo Devi Netam, ka la kyllon hapoh ka Ïingdorbar Rajya Sabha ha ka Sngi Thohdieng katba ka dang leit tur shajan ba shong u Shongknor ban pyrshah halor ka jinglait tuh ki kot jingkylli ka eksamin NEET. Ïa kane ka MP la hap ban leit rah mardor sha hospital.
Lah ban kdew ba katei ka MP bad kiwei pat ki la leit tur shajan ba shong u Shongknor ka Rajya Sabha hapdeng ba dang ïaid ka jingïatai halor ka jingkren ka President sha ka Dorbar.
Na ka liang u Shongknor ka Rajya Sabha, u Jagdeep Dhankhar, u la pyntip ha ka Dorbar ba ki doktor ki dang peit bniah ïa ka koit ka khiah jong ka Netam bad ym donkam ban khuslai.
“Nga la ïoh jingtip na hospital. Katei ka MP ka la sdang ïoh bor…ki doktor ki ong kumta. Kan hap ban don sa katto katne kynta ha hospital namar ki doktor ki ong ba hap ban peit bniah. Ki nongtrei na ka Rajya Sabha ruh ki don lang ha katei ka hospital,” la pyntip u Dhankhar.
Mynta ka sngi, ki MP ka liang pyrshah ki la ïakhih hapoh Dorbar ban pynpaw ïa ka jingpyrshah ïa ka jinglait lut ki kot jingkylli jong ka eksamin NEET, bad la hap ban pynwai shipor ïa ka Dorbar.
Na ka liang u nongïalam ka Liang Pyrshah, u Mallikarjun Kharge, u la ong ba dei ban don ka jingïatai halor ka mat kaba ïadei bad ka NEET hapoh Dorbar bad dei ban pynpep shwa ïa ka jingïatai halor kiwei pat ki mat kiba la buh ban ïakren mynta ka sngi.
U MP ka Congress, u Jairam Ramesh, u la ong ba 22 ngut ki MP na ka INDIA Bloc mynta ka sngi ki la ai da ka jingthoh hapoh ka Rule 267 ba dei ban ïakren noh mardor halor ki mat jong ka NEET bad NET.
Hynrei na ka liang u Shongknor u khlem ailad ban don ka jingïatai bad namarkata, ki MP ka liang pyrshah ki la ïakhih bad pyrta.
Na ka liang ki MP kiba shong ha ka liang pyrshah ki la mih ruh napoh Dorbar kum ka dak ban pyrshah halor ki jingkynnoh ba ka la don ka jingleh thok ha ka eksamin NEET.
