Ranchi, Jylliew:
Ka Jharkhand High Court ha ka sngi Thohdieng ka la ai jamin ïa u Myntri Rangbah barim jong ka Jharkhand u Hemant Soren halor ka mukotduma jong ka jingshah kynnoh donkti ha ka kam bamsap kaba la mih na ka ïadie-ïathied jaka.
Ka kynhun Enforcement Directorate (ED) ka la kem ïa une nongïalam jong ka Jharkhand Mukti Morcha (JMM) ha ka 31 tarik, Kyllalyngkot. Hashwa kane jingshahkem, u Hemant Soren u la kyntait halor ki 7 tylli ki shithi khot hajir. U la phet rieh na ki kti jong ka aiñ da kumba shi sngi bad hadien kane u la leit mih hakhmat ki heh ka kynhun tohkit. Une tnongïalam jong ka seng JMM u la thmu ban aiti ïa ka shithi iehnoh kam sha u heh nongïalam jong ka seng u Champai Soren.
Kumba la ïathuh ka tyllong khubor, la ong ba u heh ka kynhun nongbishar jong u Hemant Soren u Arunabh Chowdhury u la ong: “Ïa ka jingpyllait jamin la ai ïa u Soren. Ka ïingbishar ka la ong ba na ka jingbishar kaba hashwa la tip shai ba u Soren um shym la donkti ha ka kam beaiñ. Kam shym don jingeh ei ei ïa une uba la shah kynnoh lada u shah pyllait jamin.” U Hemant Soren u la shah set patok ha Birsa Munda Jail. Ha ka por ba la pynlong ïa ka jingbishar, u nongïasaid aiñ jong ka kynhun ED u SV Raju u la pyni nia ba lada u Soren un shah pyllait jamin, un sa leh ïa ki kam beaiñ.
