Chandigarh, Jylliew:
Ki heh shipai ha ka sngi Saitjaiñ ki la ong ba ka kynhun jong ki shipai ka tnat Border Security Force (BSF) ki la ïoh ban kurup ïa palat 6 kilo u Heroin ha Amritsar distrik jong ka Punjab.
Ki shipai ka tnat BSF, hadien ba ki la ïohi ba don ka Drone kaba la her bad hadien ba ki la ïoh ïa ka jingtip kaba bniah halor ka jingdon jong ki drok, ki la pynlong ïa ka jingleit khynra kaba jur ha kaba ki la ïoh ban kurup ïa u drok uba 6.130 kilo.
“Ïa ka song kaba nyngkong jong u drok uba 560 grams la ïoh ban kurup na ka shnong Mahawa, bad ka song kaba ar kaba don ïa u drok uba khia da 5.570 kilo la ïoh ban kurup na ka shnong Kakkar, kine baroh ar tylli ki shnong ki don ha Amritsar distrik,” la ong ki shipai BSF ha ka jingpyllait khubor lyngba ka rynsan X.
“Ïa kine ki song baroh ar tylli la pynhap da ki Drone jong ki nong Pakistan. Ki shipai BSF ki la ïeng skhem na ka bynta ban lah ban tehlakam bad ban ïakhun pyrshah ïa u drok ba la ju khaïi ha ki bynta khappud,” la bynrap ka kynhun shipai BSF.
