Chennai, Jylliew:
U Myntri uba dei khmih ïa ka Sports Development and Youth Welfare u Udhayanidhi Stalin, uba la pynlong ïa ka prokram ban pynbna ïa ka mat treikam kaba kyrpang, u la ong ba ka la don ka skhim kaba thymmai na ka bynta ban kyntiew ïa ki kynthei ha ki lad ïohkam ïohjam ïa kaba la tip kum ka Tamil Nadu Women Employment and Protection Scheme ha kaba yn sa pyntreikam ïa kiba bun ki bynta ha ka jinglut kaba `. 1,185 klur na ka bynta ki san snem hapdeng u snem 2024 bad 2029.
Ka jingmang na ka bynta ban pyntreikam ïa ka skhim na ka bynta u 2024-25 kan sa long T. 168 klur.
Ha ka jingai jubab halor ka jingïakren halor ki mat ba la buh na ka bynta ka jingai jingkyrshan jong ki tnat jong u, u Udhayanidhi u la pynbna ïa kiba bun ki skhim, kynthup kito kiba don jingthmu ban pynkylla ïa ki kynthei sha ki heh spah lyngba ki karkhana bapher bapher, ban ïarap ïa ki samla kynthei jong ki kyrdan Graduate ba kin lah ban ïoh ïa ki sap ba bun ha ki kam jong ki, bad ban buh ïa ki jingkhmih bniah ban tip ïa ki sap ba ki khynnah ki don naduh ka por ba ki dang leit skul.
Kum ka jingpynpaw ba ka jingnohsynñiang lang jong ki kynthei ka long ka bynta kaba kongsan na ka bynta ka Tamil Nadu ba kan kynjoh ha ka ïoh ka kot ha u snem 2030, u Myntri u la ong ba ka skhim, kaba don jingthmu na ka bynta ban ithuh ïa ki sap jong ki kynthei ha ki distrik bapher bapher, yn sa pyllait ha ki phra tylli ki distrik ha ka bynta kaba nyngkong.
