Mumbai, Naitung:
Ki la don kumba 93 ngut ki briew kiba la kem pang kynsan ha kaba ki la ud shitom bad pang kpoh hadien ba ki la dih ïa ka um jaboh na kawei ka pung kaba don ha ka shnong kaba ha Nanded distrik ha Maharashtra, la ïathuh ki heh ba dei khmih.
Ka shnong Mugaon Tanda, ha kaba ka jingjia ka la jia, ka la don kumba 107 tylli ki ïing bad ki la don baroh kumba 440 ngut ki nongshong shnong, kumba la ïathuh ki heh ba dei khmih. Ki la don baroh kumba 93 ngut ki briew kiba la shah sumar ha ka jaka ai jingsumar ha ka 26 tarik, Jylliew bad ka 27 tarik, Jylliew kiba la ud shitom kpoh bad tlot, la ïathuh u District Health Officer u Balaji Shinde ha ka jingïakren bad ki nongthoh khubor.
Ki la don kumba 56 ngut ki nongpang kiba la shah sumar ha ka shnong Mugaon Tanda, 37 ngut kiwei pat ki la shah sumar ha Primary Health Centre kaba don ha ka shnong ba marjan jong ka Manjaram bad hadien ba ki la ïoh jingsumar ki la shah pyllait noh, la ong u Shinde. Ka kynhun jong ki doktor ka la mih ban leit sha ka shnong Mugaon Tanda, la ïathuh ki heh ba dei khmih.
“Ngi la pynlong ïa ka jingwad bniah bad kumba la shem la ong ba ka jingshah ktah jong ki briew ka la long na ka daw jong ka jingjaboh jong ka um ba ki dih ïa kaba la pynpoi sha ki nongshong shnong lyngba katei ka pung. Ïa kane ka pung mynta la khang ban pyndonkam bad ïa ka um ban pynpoi sha ki nongshong shnong la tan na ka jaka pyllang um kaba don ha marjan ka thaiñ,” la ïathuh shuh shuh u Shinde.
