New Delhi, Naitung:
Hadien ka jingshahkem jong u Arvind Kejriwal ha ka kynhun Central Bureau of Investigation, u Sanjay Singh jong ka seng Aam Aadmi Party u la ong ba ka sorkar kmie ka la leh khlieh ha kaba ïadei bad ka jingbishar.
Ha ka jingai jingkren sha ki nongthoh khubor, u MP jong ka seng AAP ha Rajya Sabha u la pynshisha da kaba ong ba ka kynhun CBI ka la kem ïa u Myntri Rangbah jong ka Delhi da ka hukum kaba la wan na ka sorkar kmie bad u Myntri Rangbahduh u Narendra Modi.
Kumba la ïathuh ka kynhun jong ki nongthoh khubor, la ong ba u Singh u la ong ba ka Rouse Avenue Court ha Delhi ka la dep ban ong ba ka kynhun ED kam shym lap sabut ei ei pyrshah ïa u Myntri Rangbah ha kaba ïadei bad ka jingjia pyndkoh treikam hapoh ka tnat Excise.
“Ka ïingbishar (Rouse Avenue Court) ka la ong ba ka hukum jong ka ka long ba ka kynhun ED kam shym don kano kano ka sabut kaba long pyrshah ïa u Arvind Kejriwal bad ka jingtreikam jong ka ka long tang ban pynpaw pyrthei ba ka long pyrshah ïa u. Ka kynhun ED kam shym la tohkit ei ei ha kaba ïadei bad ka jingkamai spah pyrshah ïa u Arvind Kejriwal, kam shym don kano kano ka sabut, ne kano kano ka jingïoh kurup ïa ka pisa kaba beaiñ bad namar kane u Arvind Kejriwal u dei uba lui lui, ki briew jong ka kynhun ED ki la poi ha High Court khlem kano kano ka nongrim, ka jingleh jong ka ka long kaba beaiñ khlem kano kano ka jingai hukum bad ka la phah pynsangeh na ka bynta ban pyllait jamin ïa u,” la ong u Singh.
U MP jong ka seng ha Rajya Sabha u la ong shuh shuh ba u Kejriwal u la shahkem hadien ka jingai hukum jong ka sorkar kmie.
“Ka sorkar kmie ka la sngew ba u Kejriwal u la dei ban shah pyllait jamin… hynrei ka sorkar BJP ka la leit wut wut ban mudui sa kawei pat ka mukotduma kaba thymmai pyrshah ïa u Arvind Kejriwal bad kem ïa u,” la bynrap u Singh.
U Arvind Kejriwal u la shah pyllait jamin hashwa ha une u bnai da ka Rouse Avenue Court ha kaba ïadei bad ka jingdonkti ha ka kam bamsap kaba la mih na ka jingpyndkoh treikam hapoh ka tnat Excise.
Ha kaba ïadei bad kane, ha ka sngi kaba bud, ïa ka hukum ba la dei ban pyllait jamin ïa u Myntri Rangbah jong ka Delhi la phah pynsangeh shwa da ka High Court namar ka jingkyrpad kaba la wan na ka kynhun ED.
Ka High Court ka la hap ban pynsangeh noh ïa ka rai ban pyllait jamin ïa u, ha kaba hadien kane, u Kejriwal bad u nongïasaid aiñ jong u hynnin ka sngi ki la leit mih sha ka Supreme Court.
