Amaravati, Naitung:
Ki jingpyntreikam ha kaba ïadei bad ka rukom pynpoi um hapoh ka jingtreikam jong ka National Jal Jeevan Mission (NJJM) ka la sdang ïa ki sienjam ha kiba bun ki shnong kiba hap hapoh ka thaiñ Marripudi bad Chandrasekharapuram kiba don ha Prakasam distrik jong ka Andhra Pradesh.
Katba 80% na ki jingtrei la lah ban pyndep, kiba dang sah ki la long 20% ha kaba la khmih lynti ban pyndep ïa kine ha une u snem 2024. Ki heh jong ka Rural Water Supply (RWS) Department ki dang pynkhreh na ka bynta ban khot Tender shen.
Ïa ki 1,529 tylli ki jingtrei hapoh ka jingtreikam jong ka Jal Jeevan Mission Programme la shim ha ka jingmang tyngka kaba T. 579 klur ha u snem 2019 halor ka jingthmu ban pynbiang bad ban pynpoi um has baroh lyngba ki Functional Household Tap Connections (FHTC) ha u 2024.
Ha kaba ïadei bad kane, ka kynhun ba la thung da ka sorkar ka la trei na ka bynta ban ïoh ïa ka syrnod NABL (National Accreditation Board for Testing and Calibration Laboratories) na ka bynta ki 7 tylli ki jaka ba dei khmih bniah ïa ka jinglong jong ka um ha ka distrik.
Kum ban shu pynkynmaw, la ong ba ka kynhun jong arngut ki dkhot, kiba kynthup ïa u AK Gupta bad u Ashok Kumar Basara, ki la leit ban jurip bniah ïa ki jingtrei kiba don ha ki 16 tylli ki shnong kiba hap hapoh ka Har Ghar Jal jong ar tylli ki thaiñ ha ka 26 tarik, Nohprah, 2022.
Ki la ïashim bynta ruh ha ki prokram pynsngewthuh ba la pynlong ha ki shnong ha kaba ïadei bad ki rukom pyntreikam halor ka um. Ki riewshemphang ki la ong, “Ngi la leit ban jngoh bad jurip bniah ïa ki 16 tylli ki shnong kiba don ha ki ar tylli ki thaiñ bad jurip bniah halor ki rukom pyntreikam ïa ki jingtrei. Ha ka por ba la don ka jingleit jurip bniah ha katei ka jaka bad lyngba ka jingïakren bad u Panchayat Sarpanch bad ki Secretary, ki nongshong shnong, ki riewkynthei bad ki heh sorkar, ngi la buh ryntih ïa ki rukom pyntreikam na ka bynta kane ka bynta halor kiba bun ki jingpyntreikam.
Ki riewshemphang ki la ai jingmut ïa ki heh nongpynïaid distrik ba ki dei ban shim ki sienjam na ka bynta ban ïoh ka jingshah ithuh jong ka NABL na ka bynta ki RWS Water Testing Lab ki ban sa ïarap na ka bynta ka jingpdiang ban pyntreikam ïa ki jingtrei hapoh ka NJJM.
Ki la kyntu ruh ïa ki heh ba dei khmih ha kaba ïadei bad ka jingpyntreikam ïa ka ‘Grey Water Management System’ ha ki shnong na ka bynta ka jingthmu ban pynpoi um sha ki briew.
U RWS Superinten-ding Engineer SK Mardhan Ali u la batai shai kumne, “Napdeng ki 16 tylli ki shnong ba la dep ban leit jurip bniah, ki ïing ha ki lai tylli ki shnong ki la ïoh um. Ki jingtreikam ha ki 6 tylli kiwei pat ki shnong kin sa sdang shen. Ha kiwei pat ki 7 tylli ki shnong kiba sah, ki jingpyntreikam ki dang don hapoh ka jingmang pisa bad ïa ki Tender shen yn sa khot noh.”
U District Collector Dinesh Kumar bad ki heh jong ka RWS ki la sngew-kmen ban ïoh ban pynbiang kumba 55 litre ka um sha man ki briew man ka sngi lyngba ka FHTCs katkum ka jingpynïaid jong ka National Jal Jeevan Mission (NJJM), la pyntip ka SE sha ka kynhun ba dei khmih.
