New Delhi, Naitung:
Kumba la batai da ki nongwad bad ki nongkhmih bniah, la ong ba ka ri ka la pynkhlaiñ ha kaba ïadei bad ka jingpynkhreh kum shi bynta ban long ki lad jingïada na ki kam pyntriem jong ki lehnoh bad ki jingthmu jong ki ban thombor ïa ka ri da kaba pyndonkam da ki Drone ban leh ïa kiba bun ki kam pyntriem.
Lada ym lah ban pynbiang ïa ki lad ai jingïada ka ri kam don ha ka jingshngaiñ bad lada duna ki lad ai jingïada bad khanglad ïa ka jingthmu thombor jong ki nongshun ba nabar ri kiba bun ki jingjia basngewsih kin sa ïai jia na ka por sha ka por khamtam ha ki bynta khappud.
Ha kaba ïadei bad kane, ki heh jong ki kynhun wadbniah, ki la ong ba ki heh ba dei khmih ki la dei ban nang pynkhlaiñ shuh shuh ha kaba ïadei bad ka jingpahara ha ki bynta khappud bad kumjuh ruh na ki bynta ki suiñ ban lait na ka jingshah thombor ha ki Drone. Kine ki stad wadbniah, ki la ong ba ka jingap jingma jong ka ri ka la long na ka ri Pakisatn ha kaba ka la don jingthmu ban nang pynbun bad ban pyndonkam da ki Drone kiba kham heh bad kiba kham khlaiñ bor ha kaba ïadei bad ka jingthmu ban thombor ïa ka ri.
Ki jingtohkit ki la don halor ka jinglap ïa kiba bun ki Drone ha ka ri ha kaba la ju sakhi ba kine ki wan na Pakistan bad ïa kine la ju pyntreikam da ki kynhun lehnoh kum ka kynhun Lashkar-e-Tayiba bad Jaish-e-Mohammad kine baroh ar jong ka Jammu & Kashmir bad kumjuh jong ka Kashmir. Ïa ki Drone ba la shna ha China la ju pynbiang sha ki kynhun lehnoh da ki nongsyntiat jong ka Pakistan.
Ha ki bnai ba la lah, ka kynhun Intelligence Bureau ka la ong ba ka kynhun Lashkar-e-Tayiba ka la pynlong ïa ka jingialang bad ki heh nongïalam jong ki lehnoh ha Pakistan ha ka por ba la don ka jingïamir jingmut ban pyntreikam ïa ki Drone na ka bynta ban thombor pyrshah ïa ka India.
