Raipur, Naitung:
Ki la don san ngut ki lehnoh Naxal kiba la shah pynïap ha ka jingïasiat kaba markylliang bad ki shipai ïada ri ha Narayanpur distrik kaba don ha Chhattisgarh ha ka Sngi Ba-ar, la ïathuh ki pulit. Ka jingïasiat kaba markylliang ka la jia ha kawei ka khlaw kaba hap hapoh ka thaiñ ba dei khmih ki pulit ka Kohkameta kaba don ha Abujhmad, haba ki kynhun shipai ha ryngkat ka jingïatreilang bad ki pulit ki la pynlong ïa ka jingleit khynra lehnoh, la ïathuh u heh pulit.
“Ki la don san ngut ki lehnoh Naxal kiba la ïap ha ka jingïasiat haduh ba la thoh ïa ka khubor. Ka jing-leit thwet lehnoh ha kane ka thaiñ ka dang ïai bteng,” la ong u heh pulit, ha kaba u la bynrap shuh shuh da kaba ong ba ki shipai kim shym shah ktah ei ei ha kane ka jingïasiat.
Kiba la ïadon bynta ha kane ka jingleit thwet lehnoh, ki kynthup ïa ki shipai jong ka kynhun District Reserve Guard, Special Task Force, Border Security Force bad Indo-Tibetan Border Police na kylleng ki distrik, ha kaba ka la sdang naduh ka Sngi U Blei, la ïathuh shuh shuh u heh pulit.
Da ka jingdon jong kine ki lehnoh kiba dang shah siat shen, ka jingdon jong baroh ki Naxal kiba la shah pynïap haduh mynta ha une u snem ha ka jingïasiat ba markylliang bad ki shipai ïada ri ka la kiew sha ka 138 ngut.
Ki la don kumba 136 ngut ki lehnoh Maoist kiba la shah siat ïap ha Bastar Division, kynthup ha ki 7 tylli ki distrik kumjuh ha Narayanpur, ar ngut kiwei pat ki la shah siat ïap ha Dhamtari distrik kaba hap hapoh Raipur Division.
Ha ka 15 tarik, Jylliew, ki la don 8 ngut ki lehnoh Naxal bad uwei u shipai jong ka kynhun Special Task Force (STF) kiba la ïap ha ka jingïasiat kaba markylliang kaba la jia ha Narayanpur distrik.
Nalor kine, ki la don 6 ngut ki Naxal kiba la shah siat ïap ha ka jingïasait kaba la jia ha Narayanpur ha ka 5 tarik, Jylliew bad 7 ngut ki la shah pynïap ha khappud Narayanpur-Bijapur ha ka 23 tarik, Jymmang.
Ki la don 12 ngut ki Naxal kiba la shah pynïap ha ka jingïasiat kaba la jia ha Bijapur ha ka 10 tarik, Jymmang, katba 10 ngut ki lehnoh kynthup ki kynthei ki la shah siat ïap ha ki bynta khappud jong ka Narayanpur bad Kanker distrik ha ka 30 tarik, Ïaïong.
Ha ka 16 tarik, Ïaïong ki la don kumba 29 ngut ki Naxal kiba la shah siat ïap ha ka jingïasiat kaba markylliang bad ki shipai kaba la jia ha Kanker distrik, la ïathuh ki heh pulit.
