New Delhi, Naitung:
U Myntri Rangbah jong ka Delhi u Arvind Kejriwal hynnin ka sngi u la leit sha Delhi High Court na ka bynta ban pan jamin ha kaba ïadei bad ka mukotduma kaba la kynnoh ba u la donkti ha ka jingpyndkoh treikam hapoh ka tnat Excise.
Ha ka Sngi Ba-ar, u nongïasaid aiñ jong u Myntri Rangbah u la pyntip sha Delhi High Court ba un sa phah ïa ka jingkyrpad jamin ha kaba ïadei bad ka jingshah kynnoh bamsap na kane ka rukom pyntreikam hapoh ka tnat Excise.
Ka ïingbishar ha kaba ïadei bad kane, ka la bthah ïa ka kynhun Central Bureau of Investigation (CBI) ba kan ai jubab halor ka jingkyrpad ban pyrshah halor ka jingshahkem jong u ha kane ka jingjia. Ka Justice Neena Bansal Krishna ka la phah jingthoh sha ka kynhun Central Bureau of Investigation (CBI) bad bthah ruh ba ka dei ban ai jubab halor kane hapoh hynñiew sngi bad ban buh ïa ki daw halor ka jingpyrshah jong ka ha ka 17 tarik, Naitung.
