New Delhi, Naitung:
U nongïalam ka liang pyrshah ha Rajya Sabha, u Mallikarjun Kharge ha ka Sngi Balang u la pynshai halor ka jingmih noh ki seng hapoh ka INDIA Bloc na ‘Upper House’ bad ther tyngeh ïa u Myntri Rangbahduh ka ri, u Narendra Modi, da kaba kynnoh ba u thok u shukor na ka por sha ka por bad ïalam bakla ïa ki paidbah bad ka ri.
Haba kren sha ki lad pathai khubor ha phyllaw jong ka Parliament hadien ba la mih noh napoh dorbar, u Kharge ha ryngkat ka jingsynran jong katto-katne ki nongïalam ba kynthup ïa ka Sonia Gandhi, Sharad Pawar bad Manoj Jha u la ong, “Ngi (INDIA Bloc) la mih noh na ïingdorbar naba u Myntri Rangbahduh u la kren bakla hapoh ïingdorbar haba jubab ïa ka ‘Motion of Thanks’ halor ka jingkren ka President. Mynta ka la long ka jingmlien ïa u Myntri Rangbahduh ban thok ban shukor man ka por bad ïalam bakla ïa ki paidbah.”
Haba kynthoh ïa u Modi uba ñiew ïa ka Congress kum kaba pyrshah Riti Synshar, u Kharge u la ong, “Phim shym la thoh ïa ka Riti Synshar ka Ri, kumjuh phim shym la ïadon bynta bad ka. Phi la pyrshah ïa ka baroh shi katta naduh ba thoh bad mynta phi ong ba phi dei ki nongïada jong ka Riti Synshar.”
“Nga shu kwah pynsngew hakhmat jong u mano ba la thoh ïa ka Riti Synshar bad mano ba ïada ïa ka,” la ong u President ka Congress.
U Kharge u la kynnoh ba ka seng kaba la kyntait ïa ka Riti Synshar ka ri bad kaba la pyrshah naduh ba la pynkha ïa ka, mynta ka ong ba ka ïada ïa ka da kaba kynnoh ïa ka Congress ba ka pyrshah ïa ka Riti Synshar.
U la ong ruh, “Ka dei kajuh ka seng kaba la thang ïa ki tyngshop jong u Ambedkar bad Nehru ha Ramlila Maidan bad mynta ki kynnoh ïa ngi ba ngi dei kiba pyrshah Riti Synshar.”
U Kharge u la ther tyngeh ruh ïa u Myntri Rangbahduh ka ri halor ka jingpynsaphriang ïa ki jingtip ba bakla shaphang u Baba Saheb Ambedkar da kaba ong ba ka Congress kam shym la ai burom ïa u Ambedkar, da kaba bynrap ba “ka jingshisha ka long mar khongpong.”
U la ong ba u kwah ban pynshai halor baroh ki jingkren bakla jong u Myntri Rangbahduh, hynrei ym shym la ai lad ïa u ban kren.
“Nga la rah ïa ka kti. Nga la kyrpad ruh ïa u Myntri Rangbahduh hynrei um shym la sngap,” la kam u Kharge.
“Ngi pynrem ïa kane bad mih noh napoh ïingdorbar, haba ki kyntien jong ngi kim shong dor, kan myntoi aïu ban shong hangto,” la ong utei u nongïalam ba rangbah ka Congress.
Ha kawei ka liang, u khlieh nongïalam ka NCP, u Sharad Pawar u la ong ba u LoP ka Rajya Sabha u bat ïa ka kyrdan ka Riti Synshar ka Ri bad u dei ban ïoh ka burom na u Chairman kumjuh na u Myntri Rangbahduh ka ri. Hynrei ym shym la ai sha u ïa kata ka burom ïa kaba ka liang pyrshah baroh kawei ka la don lang bad u.
