Lucknow, Naitung:
U Myntri Rangbah jong ka Uttar Pradesh u Yogi Adityanath u la pynbna ba ka la don ka jingtohkit halor ka jingjia ha Hathras hapoh ka jinglamkhmat jong u Nongbishar barim jong ka Allahabad High Court u Brijesh Kumar Srivastava.
U IAS Officer ba la shongthait u Hemant Rao bad u IPS barim u Bhavesh Kumar Singh ki la long ki dkhot jong ka kynhun tohkit.
Ha ka jingïakren bad ki nongthoh khubor hadien ba u la wan ban jurip bniah ïa ka jaka ba la jia ka jingjia bad ïa ki briew kiba la mynsaw kiba la shah sumar ha ki hospital, u Yogi u la ong ba kam shym don kano-kano ka jingsuhbuit sniew kaba sha lyndet ha kaba ïadei bad ka jingjia.
Ka kynhun nongbihsar kan sa tohkit bniah halor ka jingjia ha kaba yn sa wanrah ïa ka kaiphot hapoh ki ar bnai.
Kum shi bynta ban khanglad ïa kum kine ki jingjia ba kin jia, ka kynhun nongbihsar kan sa khmih bniah bad ai jingmut ïa ki rukom pyntreikam bad ki jingbuh kyndon haba don ki jingïalum jong ki riewngeit kum ha kine ki jaka, la ong u Yogi.
Kumba la sakhi, la ong ba kiba bun ki tiar pyndonkam bad ki jingrah jingrong la ïohi ba ki la saphriang ha kylleng ki jaka hadien ba la jia ka jingïaïuh para briew hadien ka jinglehniam ha ka thaiñ Sikandara Rao kaba don ha Hathras distrik jong ka Uttar Pradesh.
Ha kaba ïadei bad ka jingkhmih bniah ïa ka kaiphot ba la ïohlum hashwa, la ong ba ka kynhun tohkit kaba kyrpang ba la lamhmat da u Anupam Kulshreshtha jong ka ADG Agra Zone, u Yogi u la ong ba ki kynhun nongïarap jong u Bhole Baba, kiba la shah pyntreikam ha ka jaka ba don ka jinglehniam ba la jia ka jingïaïuh para briew, ki la ïaleh ban pynïaid beit ïaid ryntih ïa ki rukom pyntreikam bad kim shym la ailad ïa ki heh sorkar ba kin don hapoh ka dara. Ki pulit ki la ïeng habar jong ka dara.
U Yogi u la ong ba kine ki nongïarap ki la phet krad hadien ba la jia kane ka jingïaïuh para briew khlem da pynshitom ha ka ban ai jingïarap ïa kine ki briew kiba la mynsaw.
