New Delhi, Naitung:
Ka Delhi High Court ha ka Sngi Thohdieng ka la pan jubab na ka kynhun Central Bureau of Investigation (CBI) hapoh ka shi taïew halor ka jingkyrpad jamin jong u Myntri Rangbah jong ka Delhi u Arvind Kejriwal ha kaba ïadei bad ka mukotduma jong ka jingshah kynnoh donkti ha ka kam bamsap kaba la mih na ka jingpyndkoh treikam hapoh ka tnat Excise bad buh ba ka 17 tarik, Naitung kan long ka sngi ban bishar bniah halor kane ka bynta.
Ka kynhun nongbishar jong ka Justice Neena Bansal Krishna hashwa ka la mynjur halor ka jingkyrpad jong ka kynhun CBI ba u Kejriwal u la dei ban phah ïa ka jingkyrpad jamin hakhmat ka ïingbishar kaba bishar halor ka mukotduma. U Kejriwal u la phah biang da kawei pat ka jingkyrpad hadien ba ka High Court ka la pan jubab na ka kynhun CBI na ka bynta ban bishar bniah halor ka jingkyrpad jong u ban ïakhun pyrshah halor ka jingshahkem ha ka kynhun CBI bad ka jingshahkem na ka bynta ka jingshah tohkit. Ha ka sngi Ba-ar, ka kynhun nongbishar jong ka Justice Krishna ka la hukum ïa ka kynhun tohkit ba ka la dei ban phah jubab hapoh ki 7 sngi bad ban buh ryntih ïa ki jingthoh na ka bynta ka 17 tarik, hadien ba ka kynhun nongmihkhmat jong u Kejriwal da ka lynti katkum ka aiñ ka la dawa ba la dei ban phah jingthoh kaba shai ha kaba ïadei bad ki daw bad ki kyndon ba la donkam ban kem ïa u.
