New Delhi, Naitung:
Ka Myntri tnat pule-puthi jong ka Delhi bad ka nongïalam jong ka seng Aam Aadmi Party (AAP) ka Atishi ha ka Sngi Palei ka la hukum ïa u Chief Secretary u Naresh Kumar ba un weng noh mardor ïa ki hukum ban pynkynriah kam ïa ki 5000 ngut ki nonghikai sorkar.
Ïa ka shithi ba la tip kum ka ‘Online requests for transfer of teaching staff of the Directorate of Education’ la phah da ka tnat pule-puthi ha ka 11 tarik, Jymmang ka la hukum ïa baroh ki nonghikai kiba la shakri ïa ka kam palat 10 snem ha kawei ka skul ba ki dei ban apply na ka bynta ka jingshah pynkynriah kam. Ka hukum ka la ong ruh ba lada don kino kino kiba ïaidlait na kaei ba la hukum kin sa shah pynkynriah sha kano kano ka skul katkum ka jingibit jong ka tnat pule-puthi.
Ka Atish ka la hukum ruh ha ka 1 tarik, Naitung ba ym dei ban don iwei ruh i nonghikai ban shah pynkynriah bad ong ruh ba ka 1 tarik u Jylliew ba ym dei ban pynkynriah tang ïa ki nonghikai kiba la shakri ïa ka kam hikai la palat 10 snem ha kawei ka skul. Ha ka jingïakren ha ka jingïalang bad ki nongthoh khubor ha ka step jong kane ka sngi, ka nongïalam jong ka seng ka AAP ka la tip ba ka la don ka jingbamsap ha kaba ïadei bad kane ka jingpyntreikam.
“Kum ka jingpyrshah ïa ki hukum jong nga, la pynmih ïa ka hukum pynkynriah kam ha ka 2 tarik, Naitung ha kaba ïadei bad ka jingpynkynriah kam lajan 5000 ngut ki nonghikai. Nga la bthah ïa u Chief Secretary ba un weng noh ïa kane ka hukum. Nga la bthah ruh ïa u ban pynlong ïa ka jingtohkit kaba bniah bad tip lada don kano kano ka jingbamsap ne jingleh bymsuitñiew halor kane,” ka la ong.
“Kane ka hukum ka long kaba bakla bad kaba pyrshah ïa ka jinghikai. Namar ka jingtrei shitom jong kine ki nonghikai, ki khynnah jong ki skul sorkar ha Delhi kila leit sha ki IIT. Kine ki la long kiba bti na ka bynta ban ïakhun ïa ka JEE-NEET. Dei namar jong ki ba ki resol jong ki skul sorkar ha Delhi ki kham bha haba ïanujor bad ki skul jong ki riewshimet,” la bynrap biang ka Atishi.
Ha kaba ïadei bad kane, ka seng AAP kaba bat ïa ka jingsynshar ka la kynthoh jur ïa ka seng BJP halor ka jingkynnoh ba ka pyrshang ban pynpulom ïa ka rukom hikai kaba bha tam ba la wanrah da u Myntri Rangbah ka Delhi u Arvind Kejriwal ha ka nongbah. U heh nongïalam jong ka AAP bad u MLA u Dilip Pandey u la kdew ba ka BJP kaba synshar kum ka sorkar kmie bad u Lieutenant Governor u VK Saxena ki dang ïapyrkhat ha kaba ïadei bad ka jingpynkynriah jaka ïa palat 5000 ngut ki nonghikai na ki skul sorkar ha Delhi halor ka jingthmu ban pynpulom ïa ka rukom hikai ba la buh ha ka nongbah.
