New Delhi, Naitung:
U Myntri ka sorkar kmie uba khmih ïa ka leit ka wan lyngba ki surok u Nitin Gadkari ha ka Sngi Thohdieng u la pynbna ba ïa ka surok bah Bengaluru-Chennai Greenfield kaba thymmai yn plie da u Myntri Rangbahduh ka ri u Narendra Modi shwa u bnai December mynta u snem.
U Myntri ka sorkar kmie u la pynbna ïa kane ha ka por ba u la ai jingkren ha ka jingïalang jong ki nongïalam ka seng BJP ha Bengaluru ha ka sngi Palei.
Hashwa kane Gadkari u la pynbna ba ka por ba la antad ban pyndep ïa kane ka jingpyntreikam kan long ha u Lber jong u snem 2024.
Kane ka surok bah kaba jrong 262 km la khmih lynti ba kan pynduna ia ka por leit jingleit hapdeng kine ki ar tylli ki nongbah, ka ban shim por tang ar kynta.
Ha ka jingai jingkren ha katei ka sngi, u la pynpaw ruh ba un trei shitom katba lah ban pyndep ïa ka projek Satellite Town Ring Road (STRR) kaba kot sha ka `.17,000 klur tyngka ha Karnataka ha kaba kut jong u bnai Nohprah jong une u snem.
U Gadkari u la ong ba u la buh ka jingkyrpad ïa u Myntri Rangbah jong ka Karnataka u Siddaramaiah bad u Symbud Myntri Rangbah u D K Shivakumar ha ka jingïakynduh kaba la long ha New Delhi ban pyntikna ha ka ban pynkhuid ïa ka mariang bad ki sawdon- sawkun bad ka jingshim jaka ha ka jylla na ka bynta ban pynstet ïa ka jingpyntreikam ïa ki surok katkum ki projek ba la wanrah.
Ka jingpyntreikam ïa ka surokbah Bengaluru-Chennai kan sa ïasoh bad ka Hoskote (kaba don ha Bengaluru) sha ka Sriperumbudur kaba don ha Kanchipuram distrik (kaba jngai da kumba 40 km na Chennai).
Kane ka surok ka dei kawei na ki 36 tylli ki surokbah bathymmai ba dang shna mynta da ka NHAI, ha kaba ïa u mawnongrim la buh da u Myntri Rangbahduh u Narendra Modi ha u bnai Jymmang, 2022.
Ïa ka surokbah kaba jrong 262 km na Bengaluru-Chennai la shna ha ka jinglut kaba palat `. 17,930 klur bad kan ïaid lyngba ki jylla kiba kynthup ïa ka Karnataka, Andhra Pradesh, bad Tamil Nadu.
Ka surokbah kan long 8 tylli ki lynti na ka bynta ka jingjngai kaba 240 km, ha kaba kaba sah kan long ka lynti kaba la pynïar sa kumba 22 km.
Ka jingpyntreikam ïa kane ka projek STRR ka long halor ka jingthmu ban pynduna da 30 percent ka jingdheng kali ba shipor ha Bengaluru kum shi bynta ban ïarap ïa ki nongleit jingleit ba kim da donkam shuh ban ïaid lyngba ka nongbah halor ka jingthmu jong ki ban leit sha ki jaka sor bamarjan.
