Lucknow, Naitung:
Ka Mayawati, kaba long ka heh nongïalam jong ka seng Bahujan Samaj, ka la dawa ba la dei ban phah tohkit ha ka CBI halor ka jingshah pynïap beiñ jong u President ka seng ha Tamil Nadu, u K Armstrong ha ka Sngi Thohdieng.
Halor kane ka jingjia ka la pynpaw ïa ka jingsngew artatien ha kaba ïadei bad ki briew kiba la shahkem bad ka la kyrpad ïa u Myntri Rangbah jong ka jylla TN u M K Stalin ba un aiti noh ïa ka jingtohkit ha ka CBI khnang ban pynïoh ïa ka jingbishar hok ïa une u lanot.
Ka Madras HC ha ka sngi U Blei ka la ai jingbit ban leh burom khatduh ïa ka met basah jong u K Armstrong ha Tiruvallur distrik hadien ba ka sorkar ka la pyrshah halor ka jingkyrpad ha kaba ïadei bad ka jaka ban tep ïa u ha kaba la ong ba ka dei ka jaka ba don ki ïingbriew bad hadien kane la jied pat ïa kiwei pat ki jaka ha kaba la ïoh ha ka jaka jong ki riew shimet ha kane hi ka distrik.
Ka Mayawati, ka la leh burom khatduh ïa ka met jong u Armstrong ba la buh ha kawei ka skul jong ki riewshimet kaba don ha Perambur.
Kum shi bynta ban pynpaw ka jingbitar halor ka jingshah pynïap jong u Armstrong, ka la ong ruh ba ka rukom shah pynïap jong u ka la pynpaw ïa ka dak ba kam shym la don kano kano ka jingtreikam jong ka aiñ hapoh ka jylla TN.
“Ki runar kiba donkti shisha ha ka ban pynïap ïa u Amstrong kim pat shahkem. La dei ban aiti ïa ka jingtohkit sha ka kynhun CBI. Ngim don ka jingshaniah ne ka jingkyrmen ha ka sorkar jylla ha kaba ïadei bad ka jinglah ban pynïoh ïa ka jingbishar bahok. Kumba ka dei ban long la dei ban aiti noh mardor ïa ka jingtohkit sha ka kynhun CBI,” ka la bynrap.
Ka nongïalam jong ka seng BSP ka la ong shuh shuh ba ki Dalit ha baroh kawei ka jylla ki la shahkem hadien ka jingjia jong ka jingshah pynïap jong u Armstrong bad buh ka jingkyrpad ïa u Myntri Rangbah ba u la dei ban pyntikna ha ka ban buh jingshngaiñ na ka bynta jong ki.
Ka seng BSP ka la shimkhia bha ha kaba ïadei bad kane ka jingjia, hynrei ki nongbud jong ka seng kim dei ban bat ïa ka aiñ ha ki kti lajong, ka la bynrap.
