Panaji, Naitung:
Katkum ka kyrwoh khubor ba la ïohlum na ki heh ba dei khmih, la ong baroh 80 ngut ki briew kiba la sahkut lynti ha ka kshaid Pali kaba don ha ka thaiñ Sattari ha Goa ki la shah pyllait lut ha ka Sngi U Blei da ka jingïarap jong ki pulit ka Fire and Emergency Services bad ki pulit ka jylla.
Kine ki briew ki la sahkut lynti kynsan kynsan na ka jingwan tuid jong ka umbah-umsan ha ka wah ba ki la dei ban ïaid lyngba kaba dei ban poi sha katei ka kshaid namar ka jingjur palat jong u slap ha katei ka thaiñ, la ïathuh ki heh ba dei khmih.
Ka jingleit jngohkai jong ki briew ka la jur bha ha katei ka sngi namar ba ka dei ka Sngi U Blei, la ïathuh uwei na ki heh pulit.
“Baroh 80 ngut ki briew ki la shah pyllait na ka kshaid Pali. Kumba la pyntikna ym shym don mano mano ki ban ïap ne mynsaw na ka jingjia. Ïa ka jingpyllait im ïa kine ki briew la ïatreilang ha ryngkat ka kynhun Goa Fire and Emergency Services,” la ïathuh u Superintendent of Police (North) u Akshat Kaushal ha ka jingïakren bad ki nongthoh khubor.
Kumba la ïathuh ki heh pulit, la ong ba ka jingpyllait im ïa kine ki briew ka la sdang hadien ba la ïoh jingtip halor ka jingjia na ki pulit jong ka Valpoi Police Station kaba la long na ka jingpan jingïarap.
Ha kaba ïadei bad kawei ka jingpynbna, kaba la wan na ka tnat ba dei khmih ïa ka pule-puthi ha ka jylla, la ong ba hynnin ka sngi la pynbna shuti ïa ki skul namar ka jingïai bteng jong ka jinghap jong u slap uba jur. Ka India Meteorological Department (IMD) ka la pynbna ba la buh ka jingmaham sha baroh ha ka jylla halor ka jingjur jong u slap haduh ka sngi ba mynta, ka Sngi Ba-ar.
“Namar ka jingjur palat jong u slap, kumba la buh jingmaham da ka tnat IMD, la ong ba ka bynta ba marpdeng jong ka Goa kan sa shah ktah jur na ka jinghap jong u slap uba jur, bad kum shi bynta ban buh jingshngaiñ na ka bynta ki khynnah, la rai ban ai shuti noh ha kane ka sngi,” la ong ka shithi ba la phah da u Director jong ka tnat pule-puthi ha ka jylla u Shailesh Zingade.
