New Delhi, Naitung:
Ha kaba ïadei bad ka jingshah pyllait ba shipor, u Myntri Rangbah jong ka Delhi u Arvind Kejriwal u la shah pyllait jamin ha ka Supreme Court halor ka mukotduma jong ka jingshah kynnoh donkti ha ka jingjia kaba la mih na ki jingpyndkoh treikam hapoh ka tnat Excise hynnin ka sngi.
Ki la mih shibun ki mat kynthup halor ka jingshahkem jong u ha ka Enforcement Directorate (ED) ïa kiba la dep hukum sha ka kynhun nongbishar. Ha kaba ïadei bad kane, u Kejriwal un ym mih na patok mynta mynta naba ka jingshah pyllait jamin shipor jong u ka dang shah teh kyndon ha kaba ïadei bad ka jingshahkem ha ka ED. U heh nongïalam jong ka seng Aam Aadmi Party u la shahkem ruh ha ka Central Bureau of Investigation (CBI) ha kaba ïadei bad kane kajuh ka jingjia. Une u dang shahkem ha ka kynhun CBI. Ha ka 21 tarik, Lber, 2024, u Kejriwal u la shahkem ha ka kynhun Enforcement Directorate halor ka jingshah kynnoh donkti ha kaba ïadei bad ka jingkamai ïa ka spah bymhok ha ka por ba u dang don bynta ban pynïaid ïa tnat Excise ha Delhi na ka bynta u snem 2021-22, ha kaba hadien kane ka jingpynngat ha ki kyndon ka la long hadien ba u Lieutenant Governor u la pynpaw pyrthei halor kane ka jingdkoh treikam jong kane ka tnat.
Ka kynhun ED ka la pynshisha da kaba ong ba ïa ka pisa ba la ïoh da u Kejriwal na ka jingdie ïa ka kyiad la pyndonkam ha ka jingpynlut pisa na ka bynta ka jingdon jong ka jingïalang paidbah jong ka seng ha Goa naba u la long u nongaibuit jong ka seng AAP.
