Lucknow, Naitung:
Kum shi bynta ban ym duh jingkyrmen hadien ba ka la shah ktah ha ka jingïakhun ïa ka ilekshon Lok Sabha ha Uttar Pradesh, ka seng Bharatiya Janata Party (BJP) ka la pyntikna ba kan ïaid shakhmat da ka jingpynkhlaiñ shuh shuh ïa ki jingpyntreikam bad ban wanrah ïa ka jingïatylli, hadien da kaba bud ïa ka bynta jong ka jingïai bteng bad ka jingim ka ban kynjoh shajrong kumba la mut na ka bynta ka jingthmu ba shisha.
Kum shi bynta ban pdiang ïa ka jingmynjur kaba kynthup ïa kiba bun ki mat, kynthup ïa ka jingïai ban halor ki jingkular jong ka ban mang kyrpang ïa ki OBC bad ki Scheduled Castes katkum ka Riti synshar ka ri, ka seng BJP ka la pynlong ïa ka jingïalang jong ka State Executive Committee ha Lucknow ha ka sngi U Blei.
Ha kane ka jingïalang la leit ban ïashim bynta da palat 3000 ngut ki nongïalam, kiba kynthup ïa u President jong ka seng ha ka ri u JP Nadda, u National General Secretary jong ka seng BJP u Vinod Tawde, ka MP barim ka Smriti Irani, bad ka kynhun jong ki nongïalam ka seng BJP ha ka jylla hapoh ka jingïalam jong u Myntri Rangbah jong ka UP u Yogi Adityanath.
Ka BJP ka la ïakren sani bha ha kaba ïadei bad kiba bun ki daw kiba la wanrah ïa ka jingshah rem jong ka ha ka jingïakhun ilekshon ha UP.
Ha ka por ba la ai jingkren ha ka jingïalang u President jong ka seng u J.P, u la ong ba ka seng BJP kam dei ka seng kaba tang shi sngi, hynrei kaba dei ka seng na ka bynta ka lawei bad ka jingshimkhia jong ka ka long ban nang bteng bad ban pynneh ïa ka jingtrei bad ban sakri met bad mynsiem.
U la bynrap shuh shuh da kaba ong ba hangno hangno ba phuh u syntiew Lotus, ka ju bud ka jingsynshar kaba bha.
“Ha kaba ïadei bad kiwei pat ki bynta, haba kiwei pat ki seng ki shimti ïa ka jingsynshar, ka jingsynshar jong ki ka paw da ka jingpynkynriah jaka ïa ki nongkhaïi bad ki nongbei tyngka, ka jingbym don jingshngaiñ ïa ki kynthei bad ki briew ki baduk, bad kiba bun ki kam bamsap,” la ong u heh nongïalam jong ka seng BJP.
“Ka lawei jong ka ri ka shong ha ki kti jong ngi, bad ka dei ka kamram jong ngi ban don ka jingkitkhlieh ba ngin lah ban pynïaid ïa ka da kaba phikir bha. Long kiba tip ïa kane ka jingkitkhlieh,” la kren u Nadda kum ka jingkyntu ïa kiba la don bynta ha ka jingïalang, ha kaba u la ong ba ka la dei ban don ka jingpynskhem ïa ka jingaiti bad jingkitkhlieh ka ban neh slem kaba wan ryngkat bad kiba bun ki bynta bad ki kyrdan bapher bapher hapoh ka jingpynïaid jong ka seng.
