Mumbai, Naitung:
Ha ki bnai shuwa ban pynlong ïa ka ilekshon Assembly 2024 ha Maharashtra ïa kaba la paw ba ka long ka bynta kaba kongsan, ki la don ki saw ngut ki heh nongïalam jong ka seng Nationalist Congress Party (NCP) jong ka kynhun u Ajit Pawar kiba la tyrwa ban iehnohkam hynnin ka sngi, ha kaba la khmih lynti ba kine kin sa leit phai bad ka kynhun jong u Sharad Pawar ha kine ki khyndiat sngi ban wan.
Napdeng ki nongïalam jong ka seng NCP kiba la iehnoh kam dang shen ki kynthup ïa u Ajit Gavhane uba long u heh nongïalam jong ka seng ha Pimpri-Chinchwad bad u Yash Sane u nongïalam ka NCP Students’ Wing.
Ki Corporator barim bad ki nongïalam ba kham hapoh kiba kynthup ïa u Rahul Bhosale bad u Pankaj Bhalekar, kiba khlaiñbor bha ha ki kam saiñ pyrthei katkum ka jingkhmih jong ki briew ka thaiñ, ki la aiti ruh ïa ka shithi iehnoh kam jong ki sha u heh nongïalam ka seng NCP, u Ajit Pawar, la ïathuh ka tyllong khubor.
Ki kynrum kynram hapoh ka seng NCP ka la paw pyrthei ba ki la don ki nongïalam jong ka kynhun u Ajit Pawar ki kwah ban kylla biang sha ka liang jong ka kynhun u Sharad Pawar namar ba kim shym la ïoh kumba ki kwah ha ka ilekshon Lok Sabha 2024 kaba dang dep shen.
Ka kynhun NCP jong u Ajit Pawar ka la ïaleh ban jop tang ha kawei ka konstitwensi wat lada ka la ïoh jingkyrshan na ka seng BJP bad ka seng Shiv Sena jong ka kynhun Eknath Shind, katba ka seng jong u Sharad Pawar kaba dang lah thaw thymmai ka NCP (Sharad Chandra Pawar) ka la jop ha ki 8 tylli ki konstitwensi ha Maharashtra.
Ha kaba ïadei bad kane, la ïoh jingtip ruh ba u Ajit Pawar u lah ban mih noh na ka kynhun NDA jong ka BJP bad ban ïatreilang biang bad u pasan jong u, u Sharad Pawar hashwa ka ilekshon Assembly 2024 ha Maharashtra.
Ka ilekshon ha Maharashtra jong u 2024 na ka bynta 288 tylli ki Assembly konstitwensi kan sa long ha u bnai Risaw ha kaba baroh ki seng ki la don jingkyrmen ba kin ïohrah ïa ka jingjop.
