Raipur, Naitung:
Ki la don kumba arngut ki pulit langrut kiba la shah pynïap bad saw ngut kiwei pat ki la shah pynmynsaw haba ki lehnoh Maoist ki la pynbthei ïa u bom ba khlaiñ bor u Improvised Explosive Device (IED) ha Tarrem kaba don ha Bijapur kawei na ki jaka ba kham shah ktah jur na ki kam pyntriem jong ki lehnoh Maoist ha Chhattisgarh hapdeng ka por ba ki shipai ki dang pynjur ïa ka jingleit thwet lehnoh ha kaba da kine ki jingpyntreikam la ïohlad ban pynïap ïa 139 ngut ki lehnoh ha une u snem.
Ha ka kyrwoh khubor ba la phah, la ïathuh ba ki pulit jong ka Chhattisgarh ki la pynithuh ïa kine ki arngut kiba la ïap kum u Bharat Sahu bad u Satyer Singh Kange, bad ïathuh ruh ba kine ki long ki dkhot jong ka kynhun jong ki shipai pahara kiba dang wanphai hadien ba ki la don bynta ha ka jingleit thwet lehnoh ha ka sngi Balang ha kaba u bom ba la pynap da ki lehnoh u la bthei kynsan ha ka lynti ba ki dei ïaid.
Ka kyrwoh khubor ka la bynrap shuh shuh da kaba ong ba ka kynhun shipai ka la pynlong ïa ka jingleit thwet lehnoh mar ïa ïoh jingtip shaphang ka jingdon jong ki lehnoh Maoist jong ka Darbha Division, West Bastar Division, bad ka Military Company Number 2 ha kawei ka thaiñ kaba don hapdeng ka Bijapur, Dantewada, bad Sukma.
