New Delhi, Naitung:
Ka seng AAP kumba ka la pynbna, ka la ong ba kan sa ïakhun ha baroh 90 tylli ki Assembly konstitwensi ha Haryana bad ban ïakhun marwei ha ka jylla, katba ka kynhun ba la ïatreilang bad kane ka seng ha ka ilekshon Lok Sabha ha Delhi, ka seng Congress, ka dei ka seng ba pyrshah.
Ka rai jong ka AAP kan sa pynlong ïa ka ilekshon ha Haryana kum ka jingïakhun kaba bun liang. Ka AAP ka la thaw ïa ka kyntien pyrta: ‘Badlenge Haryana ka haal, ab layenge Kejriwal’ (Yn pynkylla ïa ka Haryana da kaba wanrah ïa u Kejriwal).”
Ka seng AAP ka la thmu ban wanrah ïa ka jingïalang ha ka 20 tarik Naitung ha kaba kan pynpaw paidbah ïa ki jingkular ba la buh da u Arvind Kejriwal ban pynurlong na ka bynta ka Haryana.
Ka Election Commission ha u snem ba la lah ka la lah ban kyntiew ïa ka kyrdan jong ka seng AAP sha ka seng ban shah ithuh ha ka ri. Ka AAP ka la thaw sorkar ha Delhi bad ha Punjab; ka la don san ngut ki MLA ha Gujarat bad arngut ha Goa. Ka la don ruh ïa u Mayor ha Chandigarh.
Ïa kane ka rai la pynsngew da u Myntri Rangbah jong ka Punjab u Bhagwant Mann ha ka sngi Palei ha Chandigarh. “Ki paidbah ka Haryana ki la ailad ïa baroh ki seng. Hynrei baroh ki la lute lut na ka Haryana, kumta ki paidbah ka Haryana mynta ki la kwah ïa ka jingkylla”, u la ong.
