New Delhi, Naitung:
U President jong ka seng Congress, u Mallikarjun Kharge, u la ther da kaba tyngeh pyrshah ïa u Myntri Rangbahduh ka ri, u Narendra Modi, ha ka Sngi Thohdieng, halor ka jingkren jong u, ba la pynmih 8 klur tylli ki kam bathymmai, bad kynnoh ïa u ba u “la kyrshut mluh ha ki jingmong” jong ki samla, da kaba “kren lamler kawei hadien kawei pat”.
Kane ka jingthalaiñ jong u ka la long hadien ba u Modi u la pynksan ha ka taïew ba la lah ba ka jingthaw ïa ki 8 klur tylli ki kam thymmai ha kine ki lai ne saw snem ba la dep ka la “pynsngap jar” ïa kito kiba pynphriang lamler shaphang ka jingbym donkam-donjam.
Haba kren halor ka kaiphod ba dang shen jong ka Reserve Bank of India halor ka jingïoh kam, u Myntri Rangbahduh u la pynskhem ba ka sorkar National Democratic Alliance (NDA) ka buh hakhmat eh ïa ka jingshong-shngaiñ bad ka jingroi, bad bynrap ba ki nongbei tyngka kiba rit bad kiba heh ki pdiang ïa ka samoi kaba lai jong ka kynhun NDA da ka jingkmen.
