Hyderabad, Naitung:
U President jong ka seng YSR Congress Party (YSRCP) uba dei ruh u Myntri Rangbah barim jong ka Andhra Pradesh u YS Jagan Mohan Reddy ha ka Sngi Thohdieng u la pynbna ha ka Sngi Palei un pynlong ïa ka jingïakhih ha New Delhi kata ha ka 24 tarik, Naitung, kum ka jingpyrshah ïa ka jingshah thombor ba man ka por ïa ki nongbud ka seng jong u ha kaba la kynnoh ba la leh ïa kane da ka seng Telugu Desam Party (TDP) kaba bat ïa ka jingsynshar ha ka jylla.
U la ong ruh ba un dawa na ka sorkar kmie ba kan pyntreikam da ka jingsynshar President ne ka President’s Rule ha kane ka jylla hadien ka jingpynshisha ba ka la don ka jing-leh donbor, thombor kumba la sakhi.
U Jagan u la khot ïa ki dkhot ka longïing Sheik Rasheed, uba long u nongïalam ka kynhun ki samla jong ka sengYSRCP, uba la shah pynïap beiñ ha uwei u runar ïa uba la tip kyrteng kum u Sheik Jilani, uba la suba ba u dei u nongbud jong ka seng TDP, ha Vinukonda kawei na ki jaka sor kaba don ha Palnadu distrik, ha ka miet Sngi Balang.
U la ai burom ïa u Rasheed bad pynpaw ïa ka jingsngewlem sha ka ïing ka sem jong une uba la shah pynïap.
U la ong ba ka seng kan ïeng bad don ha ka liang jong kane ka longïing bad ban synran ïa ki khamtam ha ki por ba ki donkam.
Ha ka jingïakren bad ki lad pathai khubor kham hadien, u President ka YSRCP u la ong ba naduh ba ka seng TDP kaba la ïalam ïa ka kynhun National Democratic Alliance (NDA) ka la wan ha ka bor synshar ha ka Jylla ha u bnai Jylliew, ki la don ki jingshah thombor khlem sangeh ïa ki nongïalam bad ki nongbud jong ka seng YSRCP.
“Ha Punganur ki nongbud ka seng TDP ki la kawang maw ïa u MLA ka seng jong ngi u Peddireddy Ramachandra Reddy bad ïa u MP u Mithun Reddy”, u la pynshisha.
Haba la ong ba u Rasheed u la shah pynïap namar ki daw ba la mih ha ki kam saiñ pyrthei, u Jagan u la ther tyngeh ïa ki pulit kiba la batai ïa ka daw jong ka jingshah pynïap kum ka jingïapher jingmut ne ki daw shimet.
“Ngin sa buh da ka jing-ujor mukotduma ha ka ïingbishar bahakhlieh duh ban pan na ka bynta ban pynïoh ïa ka hok halor ka mukotduma pynïap briew ïa u Rasheed”, la ong u Jagan.
“Ngi la rai ban pynlong da ka jingïakhih ha New Delhi ha ka Sngi Palei ban pynpaw ïa ka jingleh beaiñ ha Andhra Pradesh. Baroh ki MP, MLA bad MLC jong ka seng jong ngi kin ïashim bynta ha katei ka jingïakhih. Ngin sa ïakynduh ïa ka President ka ri ka Droupadi Murmu bad ïa u Myntri Rangbahduh ka ri u Narendra Modi ban aiti ïa ka jingïakren halor ka jinglong jingman ha Andhra Pradesh,” la ong u President ka YSRCP da kaba bynrap shuh shuh da kaba ong ba ka seng kan dawa ban pyntreikam da ka jingsynshar President ha Andhra Pradesh ha kaba ïadei bad ka ka jingpynkheiñ ïa ka aiñ bad ka rukom.
Hashwa kane, u Jagan u la thoh da ka shithi sha u Modi, ha kaba u la kdew shai ïa ki kam riewkhlaw bad ki kam thombor ba shyrkhei kiba la jia ha Andhra Pradesh ha kine ki shibnai ba la dep hapoh ka jingsynshar jong ka sorkar synrop ba la ïalam da ka seng TDP.
Ha shithi kaba u la phah, u President ka YSRCP u la pynpaw ïa ka jingsngewkhia kaba jur halor ka jingbym treikam ki aiñ bad ka jingbym shongsuk-shongsaiñ ha ka jylla bad u la kyntu ïa u Myntri Rangbah ba un phah tohkit bniah halor kine ki jingjia ha ki kynhun tohkti ka sorkar kmie bad u la pan por kham kloi ban pyntip ïa ki jingtip ba bniah.
