Kolkata, Naitung:
Ha ka por ba dang jur ka jingïakynad kaba dang bteng haduh mynta ha Bangladesh, ka Myntri Rangbah jong ka West Bengal ka Mamata Banerjee ha ka Sngi U Blei ka la pynbna khubor bad rai ba kan sa plie ka jingkhang jong ka jylla na ka bynta ki briew ha ki distrik na ki ri marjan bad tyrwa jaka sah na ka bynta jong ki.
Ha ka por ba ka la ai jingkren ha ka ‘Martyrs Day’ Rally jong ka seng TMC ha Esplanade, Kolkata, ka Banerjee ka la ong ” Kaei kaba la jia ha Bangladesh ka dei ka daw hapoh ka ri jong ki bad ngi kum ka jylla ngim lah ban kynthoh ne kren ei ei halor kane. Hynrei katkum ka kyndon jong ka UN la ong ba ngi la dei ban pdiang ïa baroh ki phetwir kiba hap ban mih bad phet na ki ïing bad na ri Bangladesh bad kiba pan jaka sah shipor ha ka ri jong ngi.”
Ka la ai nuksa halor kane ïa ki nong Assam ïa kiba la ai jingbit ba kin sah ha ka thaiñ Alipurduars jong ka bynta ba shaphang Shatei jong ka Bengal na ka bynta katto katne por ha ka por ba la jia ka jingïakynad jong ki jait bynriew Bodo ha ka jylla Shatei-lam-Mihngi. Kum shi bynta ban pyntikna halor ka jingïatreilang jong ki nongshong shnong jong ka Bengal ha kaba ki bahaïing jong ki kiba la sahkut namar ka jingjia jong ka jingïakynad kaba jur ha ka bynta khappud, ka la ai jingkyrshan bad ki jingïarap sha ki nong Bangladesh kiba leit sha Bengal hynrei kiba ïakynduh jingeh ban leit phai ïing.
Ka la bthah ruh ïa ki briew jong ka Bengal ba kim dei ban pynmih kino kino ki jingpyrshah ne ban sngap ïa kino kino ki khubor lamler ha kaba ïadei bad ki jingïakhih kiba buh bad kiba wanrah jingeh ha West Bengal.
