Chennai, Naitung:
Ki pulit jong ka Chennai hynnin ka sngi ki la rah sha patok ïa saw ngut ki briew, kiba la shah kynnoh ba ki la donkti ban pynïap ïa u heh nongïalam jong ka seng Bahujan Samaj Party (BSP) ha Tamil Nadu u K Armstrong. Katkum ka jingïathuh ka kyrwoh khubor la ong ba ki pulit ki la ïoh lai sngi ban set ïa kine ki lai ngut na ka bynta ban tohkit, kine kiba la shahkem ki dei kiba la tip kyrteng kum u Ponnai Balu, Ramu bad Arul.
Ïa ka jingset kaba san sngi na ka bynta ban tohkit la ai sha uba saw uba la shah kynnoh donkti ha ka kam pynïap briew, ïa une u la tip kyrteng kum u Hariharan. Kine baroh saw ngut ki la shah ïalam hakhmat u nongbishar, ha kaba la ong ba ki la pynpaw ba kim kwah ban don ha ka kti jong ki pulit, namar ba ki ong ïohba ki shah pynïap klep. Hadien ka jingkyrpad jong ki, kine kiba la shah kynnoh ki la ïoh ïa ka kynhun ïada na ki pulit.
Haduh mynta ki la don kumba 15 ngut ki briew kiba la shahkem halor ka jingjia jong ka jingshah pynïap u Armstrong. Kumba la jia, la ïathuh ba u Armstrong u la shah pom shah mait ha ka kynhun jong ki hynriew ngut ki runar kiba la shong ha ka kali arshaka ha ka 5 tarik, Naitung hajan ka ïingsah jong u kaba don ha Perambur, ha Chennai. Na ka liang jong ki pulit ka Chennai ki la suba ba ka la don ka jingdonkti jong ki nongïarap jong u runar uba shyrkhei ba la tip kyrteng kum u Arcot Suresh, uba la shah pynïap ha u Nailar jong u snem ba la lah ha kane ka kam pynïap briew.
