Jammu, Naitung:
Uwei u shipai u la mynsaw naba ka kynhun ki shipai ka la khanglad ïa ka jingrungtuh jong ki lehnoh ha ki bynta jong u Line of Control (LoC) ha Poonch distrik kaba don ha Jammu & Kashmir hynnin ka step, la ïathuh ki heh shipai.
“Ka kynhun jong ki shipai kaba la pynkhreh bad pynap shrip ka la khanglad ïa ka jingthmu rungtuh jong ki lehnoh ha kaba nangne ka la mih ka jingïasiat kaba markylliang ha Battal Sector ha ka por 3 baje hynnin ka step,” la ïathuh u heh ka kynhun White Knight Corps ha ka jingpyllait khubor ha ka rynsan X.
“Ha ka por ba la don ka jingïasiat kaba markylliang, uwei u shipai ïakhun u la shah pynmynsaw. Ka jingleit thwet lehnoh ha kane ka thaiñ ka dang bteng,” la ïathuh shuh shuh u heh shipai.
Kumba la ïathuh ka tyllong khubor, la ong ba ka kynhun jong ki lehnoh ka la pyrshang ban rung ha ka thaiñ Battal jong ka khappud Krishnagati hynrei ki shipai kiba la pynjur ïa ka jingpahara bad ka jingpynap shrip ki la lah ban buddien ïa kine ki lehnoh ha kaba ka jingpynibor jong ki ka la pynlong ïa ki lehnoh ba kin phet krad bad leit phai biang sha ka jaka ba ki wan hynrei uwei u shipai u la shah pynmynsaw bad une mynta u la shah sumar ha ka jaka ai jingsumar, la ïathuh u heh shipai, ha kaba u la bynrap shuh shuh da kaba ong ba ka la don ka jingduhnong kaba khraw ïa ki lehnoh ha kane ka jingpynibor jong kine ki shipai.
