Bengaluru, Naitung:
U Symbud Myntri Rangbah jong ka jylla u D K Shivakumar ha kine ki khyndiat sngi ba la dep u la kynnoh ba ka sorkar BJP kaba hashwa ka la klop ïa ka pisa kaba palat T. 300 klur na ki tnat treikam bapher bapher.
“Ki la don ki kam bamsap ha kiba bun ki tnat treikam kaba la kot sha ka T. 300 klur. Ngin sa ïathuh bniah halor kane hapoh ka Ïingdorbar”, u la ïathuh ha ka jingïakren bad ki nongthoh khubor.
U Shivakumar u la ong ba ka sorkar jylla kan sa pynlong ïa ka jingtohkit kaba bniah halor kane ka kam bamsap bad ban sa ïathuh bniah hapoh ïingdorbar.
U la ong ba u MLA jong ka seng BJP u Basanagouda Patil Yatnal u la ong ba ka shuki Myntri Rangbah bad ka shuki Myntri ka shongdor T.2500 klur bad T.100 klur, bad sa uwei pat u nongïalam jong ka BJP u Goolihatti Shekar u la kren shaphang ka kam bamsap ha ka Bhovi Development Corporation, hynrei ka BJP kam shym la phah pynlong ïa ka jingtohkit ïa ki.
U Symbud Myntri Rangbah u la ong ba ki ailad ïa ka jingïatyrko nia ha ka ïingdorbar na ka bynta ban pynneh ïa ki nongrim synshar paidbah bad kim kwah ban ai jingïada ïa uno uno u Myntri, u MLA, ne uno uno u ophisar lada lap ba ki donkti ha ka kam beaiñ.
U la ong ba ka BJP ka la wahrah ïa ki kynrun kynram hapoh ïingdorbar khlem da ailad ïa u Myntri Rangbah ba un jubab namar ki tieng ba ïoh ka kam bamsap kan paw shabar lada ki ailad ïa ka ïingdorbar ba kan ïaid bad treikam shakhmat.
