![Pynjur ka kynhun ANC ha Andhra ban leit khynra jingdih pynbuaid drok](https://unongsainhima.com/wp-content/uploads/2024/07/drok-720x405.jpg)
Vijayawada, Naitung:
Kum shi bynta ban rat dyngkhong ïa ki jingkhaïi tuh ïa ki jingdih pynbuaid, ka kynhun Anti-Narcotic Cell (ANC) jong ka NTR distrik ka la ïai bteng ban pynlong ïa ka jingleit khynra sha kylleng ki jaka hadien ka jingïoh kem ïa 15 ngut ki nongkhaïi Ganja na ki jaka ba bun jong ka Vijayawada kaba la jia ha ki khyndiat sngi jong ka taïew ba la lah.
Ha katei ka jingjia, ki pulit ka kynhun ANC ki la ïoh ban kurup ïa u Ganja uba khia da kumba 90.5 kg uba la kot sha ka T. 50 lak na kine kiba la shah kynnoh bad ka la don ka jingmudui pyrshah ïa ki hapoh ka Narcotic Drugs and Psychotropic Substances (NDPS) Act, 1985.
Ha ka jingtohkit ki pulit ki la lap ba une u nongshah kynnoh u ju thied ia u Ganja na Odisha bad Visakhapatnam Agency da kaba rit bad die sha ki samla pule kolej bad kiwei kiwei.
Katkum ka jingïathuh jong u Deputy Commissioner of Police (DCP) u Hari Krishna, la ong ba kine kiba la shah kynnoh ki dei ki nongkhaïi Ganja ba pawnam bad la lap teng ïa ki ba ki pynïaid ïa ki kam beaiñ jong ki ha ka nongbah Vijayawada bad ha NTR distrik la palat ar snem.
U DCP u Hari Krishna u la ïathuh ba ïa kine ki 15ngut kiba la shah kynnoh la kem da ka kynhun ANC bad ki pulit jong ka thaiñ kaba hap hapoh ka jingsynshar jong ka Machavaram, Bhavanipuram, Suryaraopet bad Krishna Lanka, la ïathuh ka tyllong khubor.
Ha ka por ba la pynlong ïa ka jingtohkit, ki pulit ki la lap ba kine kiba la shah kynnoh ki la wanrah ïa u Ganja na Odisha bad Visakhapatnam Agency ha ki song barit bad die ïa u sha ki khynnah kolej bad kiwei pat. “Kine kiba la shah kynnoh ki dei kiba don ha ka rta kaba hapoh 35 snem, kine ki la thaw ïa ka kynhun ban die bad shalan tuh ïa u Ganja na ki thaiñ ba don ki nongïalam jong ka kynhun.
La tip ba u Pinky Routh u dei uwei na ki snar nongïalam uba donkti na sha lyndet jong ka kam khaïi Ganja. Une u la die ïa u Ganja ba la ïoh na ki nongïalam halor kane ka kam sniew ha Phulbani jong ka Odisha bad u la die ïa u sha ki samla da kaba pyndonkam ïa ka kynhun jong u” ong u DCP u Hari Krishna.