New Delhi, Naitung:
Kumba la sakhi, la ong ba ka Delhi ka la wan ha ka kyrdan balai kum ka nongbah ba jaboh tam na ki 256 tylli ki nongbah ha kine ki shiteng snem. Kane ka long katkum ka jingkhmih bniah na ka jingkheiñ ha ka PM 2.5 Data ba la ai da ka Centre for Research on Energy and Clean Air (CREA) ïa kaba la pyllait ha ka Lah Sngi U Blei.
Katkum na ka jingkhmih bniah ha ka PM 2.5 Level ha Delhi ha u bnai Kyllalyngkot haduh u Jylliew la shem ba ka jingjaboh jong ka lyer ka la long 102µg/m3 – arshah kumba dei ban long ka nongbah da 60µg/m3 bad hadien kane la bud da ka Faridabad (103µg/m3) bad ka Byrnihat ha Meghalaya da (140µg/m3).
Ki la don ruh ki jingkynshait um kiba ïaleh pyrshah ïa ki pum-pum kiba pynlynguh ha kylleng ka nongbah.
Kiwei pat ki nongbah kiba la shah kynthup ha ka thup jong ki 10 tylli ki nongbah kiba jaboh tam ki kynthup ïa ka Gurugram ha Haryana (99µg/m3), Bhagalpur kaba ha Bihar (96µg/m3), Sri Ganganagar ha Rajasthan (96µg/m3), Greater Noida (96µg/m3) bad Muzaffarnagar (95µg/m3) ha Uttar Pradesh, Ballabgarh Haryana (94µg/m3), bad Bhiwadi kaba don ha Rajasthan (92µg/m3).
Napdeng ki 256 tylli ki nongbah kiba la paw shai da kaba pyndonkam da ka jingbuh jingkheiñ jong ka Central Pollution Control Board (CPCB) ha ka PM 2.5, kaba paw ka long ba la shem ba ki la don kumba 163 tylli jong kum kine ki nongbah kiba la tam ïa ka jingthew ha ka PM 2.5 halor ka jingjaboh ka lyer kaba long 40µg/m3 bad baroh 256 tylli ki nongbah ki la tam ïa ka PM 2.5 Annual Standards kaba 5µg/m3, jong ka World Health Organisation (WHO).
Na kine, ki 163 tylli ki nongbah, ki la don tang 63 tylli kiba long shi bynta jong ka National Clean Air Programme (NCAP) bad ki la don ïa ka jingthmu ban lah ban pynduna ïa ka jingjaboh.
Kiwei pat ki 100 tylli ki nongbah kim don kano kano ka jingthmu pyntreikam ne ïoh jingïarap pisa na ka bynta ban pyntreikam halor ki lad ban lah pyllait na ka jingjaboh ka lyer, la ong ka CREA.
