![Pynjlan ka ïingbishar ban set patok ïa u Kejriwal haduh ka 8 tarik, Nailar kejriwal](https://unongsainhima.com/wp-content/uploads/2024/07/kejriwal-4.jpg)
New Delhi, Naitung:
Kum ka jingkhanglad kaba khraw, ka ïingbishar ha Delhi hynnin ka sngi ka la rai ban nang pynjlan shuh shuh ban set patok na ka bynta ban bishar ïa u Myntri Rangbah u Arvind Kejriwal halor ki mukotduma kiba long pyrshah halor ka jingklop tyngka haduh ka 8 tarik, Nailar.
U heh nongïalam jong ka seng AAP u la wan mih lyngba ka jingïakren ha ka durkhih na Tihar Jail. Ka nongbishar bakyrpang jong ka ïingdorbar, ka Kaveri Baweja, ka la rai ban pynjlan ha ka ban set patok ïa u Kejriwal, ha ka mukotduma bamsap, ïa kaba la tohkit da ka kynhun Enforcement Directorate, haduh ka 31 tarik Naitung, katba ïa ka jingshah set phatok jong u halor ka mukotduma bamsap, kaba la mudui da ka CBI, la pynjlan haduh ka 8 tarik u Nailar, la ïathuh ka tyllong khubor.
Ka nongbishar ka la pynjlan ruh na ka bynta ka jingshah set patok jong u nongïalam ka seng AAP bad u Symbud Myntri Rangbah barim ka Delhi u Manish Sisodia, u nongïalam ka Bharat Rashtra Samithi u K Kavitha bad kiwei pat kiba la shah kynnoh donkti haduh ka 31 tarik, Naitung ha kaba ïadei bad ka jingkamai ïa ka spah bymhok.
Ka Supreme Court hashwa ka la dep ban pyllait jamin shipor ïa u Kejriwal halor ka mukotduma ba la mudui da ka kynhun ED, hynrei la rai ban ïai bteng ha ka ban set phatok ïa u ha Tihar Jail kumba u la dei ban don halor ka mukotduma ba la mudui da ka kynhun CBI.