Bengaluru, Naitung:
U Myntri ka Karnataka uba dei khmih ïa ka Revenue u Krishna Byre Gowda u la pyntip ha ka Council ha ka sngi Balang ba ki la don kumba 38,78,525 ngut ki nongrep kiba la ïoh ïa ka bailutksan ha u snem 2023-24, kaba bun tam ha une u snem haduh mynta halor ka jingshah ktah jong ki na ka jingrang tyrkong.
Kum shi bynta ban ai jubab halor ka jingkylli ba la buh da u MLC jong ka seng BJP u Keshava Prasad, u Gowda u la ong ba ha ka por ba la leit, ka la don ka jingïarap pisa sha ki 23,42,667 ngut ki nongrep ha kaba kane ka la bun bha.
Ha une u snem, da kumba T. 4,047 klur ka pisa la pynlut ha kaba ïadei bad kane ka bynta.
Kane ka jingïarap pisa jong ka sorkar ka la ai jingkyrshan shibun ïa ki nongrep khamtam ïa kito kiba la ïakynduh jingeh namar ka jingshah pynjulor jong ki jingthung jingtep ha ki lyngkha jong ki.
“Ïa ka jingïarap pisa la pynbiang hadien ka jingleit jngoh jong ki heh sorkar ïa ki lyngkha ne ki jaka rep bad pynlong ïa ka jingwad bniah halor ki jingshah pynjulor jong ki jingthung jingtep. Ïa kane ka jingai jingïarap pisa la phah beit beit sha ki Bank Account jong ki nongrep, kiba la shah ktah jur na ka jingjulor jong ki jingthung jingtep kiba long haduh 33%,” u la ong.
Shuh shuh, u Myntri u la ïathuh ba ha ka sien kaba nyngkong, ka sorkar jylla ka la pynbiang ruh ïa ka jingïarap pisa kaba kyrkieh halor ka jingïap jong ki jingri jingdup sha ki 17.8 lak ngut ki nongri jingri bad `. 531 klur la mang na ka bynta kiwei pat ki jingdonkam.
Ha kaba ïadei bad kane, u Gowda u la pynpaw ruh ba ka sorkar kmie ka la ong ba ki nongrep kiba la ïoh jingïarap pisa halor ka jingjulor jong ki jingthung jingtep kim lah shuh ban dawa na ka bynta ka Insurance halor ki jingshah pynjulor naba ki dkhot jong ka liang pyrshah ki la kynnoh ba ka sorkar kam shym la pyllait ïa ka pisa na ka bynta ki nongrep na ka jingmang jong ka sorkar jylla, u Gowda u la ong, ba ka la don kumba T. 1,296.42 klur ka pisa ba la pynlut da ka jylla.
U la kynthoh jur ruh ïa ka sorkar kmie halor ka jingbym pyllait ïa ka pisa na ka bynta ka jingrang tyrkhong, ha kaba u la ong ba ka sorkar Andhra Pradesh bad ka Maharashtra kim shym la ïoh jingïarap na ka sorkar kmie wat lada ki la buh ka jingkyrpad.
“Ha ka sien kaba nyngkong ha ka ri, ngi (ka sorkar Karnataka) la leit sha ka Supreme Court ha kaba hadien kane ka sorkar kmie ka la pyllait ïa ka pisa kaba T. 3,454 klur. Lada ngim shim da kane ka sienjam, ngin ym ïoh ïa kane ka jingïarap pisa na ka sorkar kmie,” la bynrap shuh shuh u Myntri.
