Leh, Naitung:
U Myntri Rangbahduh ka ri u Narendra Modi hynnin ka sngi u la ong ba ka Pakistan kam shym la sngewthuh eiei na ki jingjia ba la dep ba ka ju ïoh jingsneng ha man ba ka leh ïa kino kino ki kam thombor ne leh donbor.
Ha ka jingleh burom ïa ki shipai ha Drass ha ka sngi ba la rakhe ïa ka Kargil Vijay Diwas, u la ong ba ka ri ka burom halor ka jingtrei shitom bad ka jinglen lade jong ki shipai ïada ri.
Ka Pakistan ka la ju shah rem man ba ka leh ïa kino kino ki kam thombor. Kam ju sngewthuh na ki jingïoh jingsneng ha ki por ba la leit, u la bynrap.
“Ha Kargil, ym tang ba ngi la jop ha ka thma, ngi la ai ruh ïa ka nuksa kaba bha jong ka jingshaniah, ka jingtehlakam bad ka bor,” u la bynrap ha ka por ba u la ai jingkren ha kane ka sngi.
“Ka jingshlur jong ngi kan sa lah ban pynduh jait ïa ki kam pyntriem jong ki lehnoh bad ki nongshun kin sa ïoh ïa ka bainong,” u la ban jur katba u dang ai jingkren ha kaba u la ong ba ka Pakistan ka la pyrshang ban leh ïa ki kam sniew lyngba ki lehnoh bad ki jingkynshoit ban wanrah ïa ki jingïapher jingmut bad kiwei pat.
