Shimla, Naitung:
U Myntri Rangbah jong ka Himachal Pradesh u Sukhvinder Singh Sukhu, u la bthah ïa ka tnad pule- puthi ba kan wad ïa ki lad ki lynti ban pynïasohlang ïa ki skul sorkar kiba duna ka jing-rung kyrteng jong ki khynnah.
Ha ka por ba la pynïaid ïa ka jingïalang jong ki heh ophisar jong ka tnad pule-puthi hangne, u Myntri Rangbah u la ong ba kane ka sienjam ym tang ba kan pynthikna ha ka ban pynbiang ïa ki nongtrei ha ki skul hynrei kan plie lad ruh ban ai ïa ka jinghikai kaba paka sha ki khynnah skul, la ïathuh ka kyrwoh ba la phah.
Kum shi bynta ban pynpaw ïa ka jingsngewkhia kaba jur halor ka jinghiar palat jong ka jingpynrung kyrteng ha ki skul Primary jong ka sorkar kaba long tang 1,30,466 ngut ha u snem 2002-2003 haba ïanujor bad ki 49,295 ngut ha u snem 2023-24, u la ong ba ki don 89 tylli ki skul Primary jong ka sorkar ïa kiba la shem ba ym don satia ki khynnah ki ban pynrung kyrshan ha ki skul ha ka jylla.
Shuh shuh, u la ong ba la shem ba ym shym don khynnah ha ki 10 tylli ki skul sorkar ki ban pynrung kyrteng katba ha ki 18 tylli ki skul ki don tang san ngut ki khynnah skul kiba la pynrung kyrteng, u la bynrap.
U Sukhu u la ong ba ka sorkar jylla ka dang buh ïa ki Rajiv Gandhi Day Boarding School haman la ki Assembly konstitwensi ha ka rukom ba la buh kyrdan ka ban pynthikna ïa ka jingnang jingstad kaba bha bad ka roi ka par ba pura jong ki khynnah skul khamtam ha kane ka juk ba mynta.
Shuh shuh u Sukhu u la ong ba ka sorkar jong u ka la wanrah ïa shibun ki buit bathymmai halor ka jingthmu ban kyntiew ïa ka kyrdan ha ki jaka treikam jong ka sorkar bad ba ïa ka English Medium ruh la pyntreikam naduh ka klass banyngkong ha baroh ki skul sorkar.
U Myntri ba dei khmih ïa ka tnat pule-puthi ka jylla u Rohit Thakur bad u Chief Parliamentary Secretary u Ashish Butail ki la long napdeng kiba bun kiba la don bynta ha ka jingïalang.
