New Delhi, Naitung 28
U Myntri Sorkar Pdeng ba dei khmih ïa ki tnad Youth Affairs & Sports bad Labour & Employment, Dr. Mansukh Mandaviya ha ka jingbteng jong ki jingpyrshang jong u ban kyntiew ïa ka jingseisoh jong ka rynsan ‘MY Bharat’, u la pynlong ïa ka jingïalang ha New Delhi mynta ka sngi bad ki samla kiba don ha ki kam bapher-bapher, ba kynthup ïa ki samla kiba la mihkhmat na ka India ha ka BRICS Youth Summit ha Russia.
Kane ka jingïalang ka dei shi bynta ki jingïalang ba la pynlong da u Dr.Mandaviya bad ki kynhun jong ki samla na kylleng ka ri ban pynlong ïa ka rynsan ‘MY Bharat’ kum ka jaka Pdeng ïa ki samla ba kin ïoh ia ki jingdonkam jong ki.
Da kaba ithuh ïa ka lad bad ka bor jong ki samla jong ka ri, u Dr. Mandaviya u la ong, “Ki samla ki dei ban shim ïa ka jingbah khlieh na ka bynta ka bha ka miat jong ka ri bad sngewthuh ïa ka thong ‘Viksit Bharat’ shuwa u 2047.”
Ha ka jingai jingkren, u Myntri Sorkar Pdeng u la kdew ïa ka jingkongsan ban pynïasoh sha ka rynsan ‘My Bharat’ bad ki kam kiba ïahap bad ki samla bad ai jingmyntoi ïa ki.
U la ong ba kine ki kam ki dei ban paw bha ha ka rynsan ‘My Bharat’ ban wanrah katba lah ka jingseisoh.
Kane ka jingïalang ka la plié lad ïa ki samla ba kin ai ïa ki jingmut jong ki shaphang ka rynsan ‘My Bharat’ da ka jingthmu ban kyntiew ïa ka jingseisoh jong ka.
U Myntri u la pyntip ïa kito kiba wan ïashim bynta ba ki jingai jingmut jong ki kin don ka bynta kaba khraw ha ka jingkyntiew ïa ka rynsan ‘My Bharat’. U la ong ba kine ki long kiba donkam bha ban kyntiew ïa ka jingiadei bad ki samla, kaba pyntikna ba kane ka rynsan ka pynbiang ïa ki jingdonkam jong ki bad ka wanrah ïa ka jingïamir jingmut shaphang ki sienjam ban kyntiew ïa ka ri. U Myntri u la ïaroh ïa ki jingai jingmut jong ki samla bad u la kular ba yn peit bniah ïa ki bad yn dang trei shitom shuh-shuh ban kyntiew ïa kane ka rynsan.
U Secretary, ka tnat Youth Affairs ha ryngkat kiwei-kiwei ki ophisar ka tnad Youth Affairs & Sports ki la ïashim bynta lang ha kane ka jingïalang.
