New Delhi, Naitung:
Kumba la ïoh jingtip, la ong ba ki la don kumba 40 haduh 50 ngut ki lehnoh na Pakistan, kiba la rieh tngen ha ki bynta kynjang jong ki jaka lum jong ka thaiñ Jammu, ha kaba kane ka la pynlong ïa ki bor pahara ba kin ïakhun pyrshah ïa ki ha kine ki thaiñ khnang ban ïohkem ïa ki, la ïathuh ka tyllong khubor ba la ïohlum.
La tip ba kine ki lehnoh, kiba la ïohlad ban rungtuh sha katei ka thaiñ, ki dei kiba la pyntbit bha ha ki kam pyntriem bad kiba la pyndap bad pynbiang da ki katto katne tylli ki tiar ïaleh kiba mynta bad kiba kham khlaiñ, kynthup ïa ki suloi M4 Carbine Rifles kiba la shna da ka America kiba la pyndap da ki tiar kiba lah ban ïohi mynmiet, la iathuh ki tyllong khubor.
Ki shipai ka tnat Army ki la pynlong ïa ka jingkerkut bad jingleit khynra ban bud bad thwet ïa ki lehnoh kiba la pynlong jaka rieh ha katei ka thaiñ.
Nalor kane, ka jingpyrshang ban wad ïa ki lynti krem ka dang ïaid mynta ha u pud u sam jong ka India bad ka Pakistan ha Samba, bad ka don ka jingpynshitom beiñ ïa ki nongïarap jong ki lehnoh.
Haba la ïoh jingtip shaphang ka jingdon jong kine ki lehnoh, ki bor pahara ki la pynpulom ïa ka jinghiar thma ki lehnoh ha kawei ka jaka treikam bad ka ïing jong uwei u nong pahara shnong (VDG) ha Rajouri distrik jong ka Jammu.
Ha ka jingïasiat kaba markylliang uwei u lehnoh u la kyllon ïap, katba uwei u shipai bad uwei u ‘riewpaidbah ki la mynsaw.
Kine ki lehnoh ki don ïa ki kuli ba la sop da ki nar jong ka China kiba lah ban rung shapoh kali ba la shna khnang ban ïada na ka jingksam jong ki kuli, la bynrap ka tyllong khubor. Kumba la ïathuh la ong ba ki lehnoh Pakistan kiba trei ha ka bynta jong ka Jammu ki dei ki briew kiba la tbit bha ha ki kam ba ïadei bad ka thma ha ki lum bad khlaw, kiba treikam ha ki kynhun kiba rit bad kiba la treikam ha ki jaka bapher bapher.
“Ki lehnoh ki la hiar thma ïa ka ïing jong uwei u VDC (dkhot) ha Gunda, Rajouri ha ka por 03.10 baje mynstep. Ka kynhun shipai kaba don hajan ka la leh pyrshah bad ka la mih ka jingïasiat kaba markylliang,” la ong u heh shipai jong ka kynhun White Knight Corps ha ka rynsan X.
Katkum ka jingïathuh ki heh shipai, la ong ba kine ki lehnoh ki la siat ïa ka ïing jong u VDG bad u shipai barim u Parshottam Kumar uba dei ruh u nongïoh khusnam Shourya Chakra ha ka thaiñ Gundha jong ka thaiñ Khawas.
Ki shipai pahara ki la pynrem jur hadien ba ki lehnoh ki la siat bom, hadien kata ki la hiar thma ïa ka jaka treikam jong ki shipai kaba dang shu lah thaw thymmai ha katei ka jaka ha ka por kumba 4 baje mynstep, kaba la wanrah ïa ka jingïasiat markylliang kaba jur, ki la ong.
Naduh basdang une u snem, ki la don 14 tylli ki jingshah thombor ha kylleng ki hynriew tylli ki distrik jong ka thaiñ Jammu kaba la wanrah ïa ka jingïap jong ki 27 ngut ki briew, kynthup ïa 11 ngut ki shipai ïada ri, uwei u nongap pahara shnong, bad san ngut ki lehnoh.
