Bhubaneswar, Naitung:
Ka sorkar jylla ha ka Sngi U Blei ka la buh jingmaham ïa ki hynñiew tylli ki distrik namar ba u slap uba jur ha ki bynta ba shaneng u la pynlong ïa ki bor pynïaid jong ka Hirakud Dam ban plie 20 tylli ki khyrdop ban pyllait ïa ka um kaba de ban tuid na ka jaka den um.
Kumba ka long mynta, la pynlait um lyngba ki 20 tylli ki khyrdop kynthup 14 tylli ki khyrdop ha ka liang kadiang bad hynriew tylli ha ka liang kamon jong ka dam.
Namar ka jingplie ïa ki khyrdop, la antad ba ka jingtuid jong ka um ha Khairmal kan long 4.50 lak Cusec haduh ka step lah sngi U Blei.
Ka jingtuid kaba kham sharum ha Mundali ka lah ban poi sha ka 5 lak Cusec ha ka sngi Ba-ar.
U Special Relief Commissioner u Satyabrata Sahu u la bthah ïa ki nonglum khajna jong ka Sambalpur, Sonepur, Nayagarh, Puri, Cuttack, Jagatsinghpur bad Kendrapara distrik ba kin long kiba husiar bad kyntu ruh ïa ki briew ba kim dei ban rung sha ka wah Mahanadi.
U la ong ruh ba la bthah ïa ki nonglum khajna ba kin long kiba husiar bad ban buddien ïa ka jinglong jingman.
Ha katei ka sngi, ka jingtuid um ha ka pung Hirakud ka la kot sha ka 2.9 lak Cusec bad ka jingtuid ka long palat ïa ka 2.50 lak Cusec.
Ka um ka la nang kiew ha katei ka dam hadien ba la jur bha u slap ha ki jaka ba shalor ha kine ki khyndiat sngi ba la leit.
U Chief Engineer jong ka Upper Mahanadi Basin u Sushil Kumar Behera u la ong kumba 3 lak Cusec ka um mynta la pynlait lyngba ki 20 tylli ki khyrdop.
“Yn sa rai shuh shuh ïa ki lad jingïada na ka jingshlei um katkum ka jingheh jong ka um, ka jinghap slap ha ka jaka ba shalor, ka jingtuid kaba lah ban mih sha ka pung bad ka jinglong jingman shapoh,” u la bynrap.
Ka tnad Water Resources ka la ïathuh ba kam don kano kano ka jingma ha Odisha kumba long mynta.
“Ka jingshlei um kaba heh tam ka ïaid lyngba ka Khairmal ha ka lah sngi u Blei bad ha Mundali ha ka sngi kaba bud. Ka wah ka duna um bad kam don kano kano ka jingma haduh ba ka jingtuid ka um kan long kumba 9 lak Cusec,” la ong uwei na ki ophisar jong kane ka tnad.
Ka sorkar ka dang peitngor bha ïa ka jinglong jingman namar ba la antad ba kan thaw ïa ka rukom treikam kaba thymmai ha ka 31 tarik, Naitung. Hapoh ka jingktah jong ka, la antad ba un slap jur ha kiba bun ki bynta jong ka jylla ha kine ki saw sngi ban wan.
Katba ka jingjur jong u slap dang shen ka la pynhiar ïa ka jingduna slap ha ka jylla kaba mynta ka la kot sha ka (-) 8 percent hapdeng ka 1 tarik, Jylliew bad 28 tarik, Naitung.
