Chennai, Naitung:
Ki la don arngut ki nongbud jong ki seng ka liang pyrshah ha kaba uwei uba dei na ka BJP bad uwei pat jong ka AIADMK – ki la shah pynïap ha Tamil Nadu ha ka Sngi U Blei.
Ki nongïalam jong ka liang pyrshah ki la kynthoh jur ïa ka sorkar DMK halor ki jinglong jingman ha ka jylla, ha kaba la ong ba kam don jingshngaiñ shuh ïano ïano ruh ha ka jylla.
U Selva Kumar, 52, uba dei u nongbud jong ka seng BJP na Sivagangai, u la sah mait haban da ïap ha ka kynhun jong ki runar ha ka miet jong ka Sngi Saitjaiñ.
“Kane ka jingjia ka la jia haba une uba la shah pynïap u la leit phai sha la ïing kaba don ha M Vilankulam ha ka kali arshaka jong u. Hadien ba u la dep ban thied kumba katto katne ki jingthied na ka ïew kaba don ha katei ka thaiñ, u la leit phai noh shaïing, kaba jngai da kumba saw km na ka jaka kaba la jia ka jingjia. Une u lanot u la khlad hadien ha ka jingshah thombor,” la ïathuh u heh pulit.
“Kam shym dei ka daw halor ki kam saiñ pyrthei ne ki jingpyntreikam jong u, kane ka jingjia ka la jia namar ki daw shimet. Ngi la ithuh ïa ki saw ngut ki runar kiba la donkti ha kane ka kam thombor bashyrkhei,” la ïathuh shuh shuh u heh pulit.
Sa ha kawei pat ka jingjia, u nongbud jong ka seng AIADMK u la shah mait haduh ba un da ïap ha ka thaiñ Cuddalore, ka jaka kaba marjan bad ka khappud Puducherry.
U Padmanaban, uba long u dkhot jong ka seng AIADMK u dei na ka thaiñ ba marjan kata na Cuddalore kaba don ha Tamil Nadu, u dang wanphai da ka kali arshaka lyngba ka Irulanchantahi ha ryngkat u paralok jong u haba la jia ka jingjia.
Ha kaba ïadei bad kane ka jingjia, la ong ba ki la don kumba san ngut ki runar ha ka kynhun kiba la buddien ïa u bad haba ki la lap ki la shoh ïa u.
Kine ki runar ki la pom bad mait da ki tiar ba nep ïa u Padmanaban, une ruh u la ïap hashen, katba u paralok jong u pat u la lait phet.
Ha ki khyndiat taïew ba la lah, u Armstrong, uba long u heh nongïalam jong ka seng Bahujan Samaj Party jong ka Mayawati ha ka jylla, u la shah mait pynïap ha ki hynriew ngut ki runar. Ki nongtohkit ki la ong ba kine ki jingjia pynïap briew ki don ka jingïadei bad ka jingïasyrïem ha kaba la ong ba ka dei ka kam pynïap briew ba la mut lypa.
Ka seng ka liang pyrshah ka AIADMK ka la kynthoh jur ïa ka seng DMK kaba bat ïa ka jingsynshar ha ka jylla.
U nongaiktien jong ka seng, u Kova Sathyan, u la ong ba kane ka kam pynïap briew ka la paw shai ba kam shym la don ka jingleh ban tehlakam ïa ki jinglong jingman ha ka jylla bad ka jingbymlah pyntreikam jong u Myntri Rangbah u M K Stalin.”
“U M K Stalin u la dei ban khmih bniah la u dang don hok ban bteng ïa ka kam kum u Myntri Rangbah,” la ong u heh nongïalam jong ka seng BJP u K Annamalai ha ka jingphah jingthoh jong u ha ka rynsan X.
U General Secretary jong ka seng AIADMK u Edappadi Palaniswami u la kynthoh jur ïa ka sorkar kaba hap hapoh ka jingïalam jong u MK Stalin halor ki jinglong jingman ha ka jylla, ha kaba la ong ba kim don shuh ki jingshngaiñ na ka bynta jongno jongno ruh ha Tamil Nadu ha kaba la ong ba ym don wat tang shi sngi ruh ba ki kam pynïap briew kin nym jia.
Ym don wat shi sngi ruh ban ym don ki kam pynïap briew ha Tamil Nadu.
