Thiruvananthapuram:
Ki la don kumba 36 ngut ki briew, kynthup ïa arngut ki khynnah, ki la ïap ha ka jingtwa khyndew kaba la jia ha Wayanad distrik kaba don ha ki jaka lum ha Kerala hynnin ka sngi.
Kumba la sakhi ha kane ka jingjia bashyrkhie, la ong ba la antad ba ki la don da palat 100 ngut ki briew kiba dang shah tep ha ka jingtwa.
Napdeng kine kiba la ïap, saw ngut ki briew kynthup ïa iwei i khynnah, ki dei kiba ha ka shnong Chooralmala jong ka distrik, katba iwei pat i khynnah iba dang shisnem jong kawei ka longïing Nepali, i la ïap ha ka shnong Thondernad, la ïathuh ka tyllong khubor kumba la ïathuh da ki bor pynïaid distrik.
Ki shnong kiba kynthup ïa ka Mundakkai, Chooralmala, Attamala, bad Noolpuzha ki dei napdeng ki jaka kiba la shah ktah jur bad duh lynti na ka jingtwa khyndew. Ha ka jingpyllait khubor lyngba ka durkhih, u MLA ka seng UDF u T Siddique u la ong ba ki bor pynïaid distrik ki dang thmu ban pynkit lyngba ki liengsuiñ ïa ki briew na ka thaiñ Mundakkai.
“Kumba ka long mynta, ngim pat don jingtip kaba tikna shaphang kito kiba jah bad kiba ïap ha ki jingtwa khyndew. Bun ki jaka ki la duh lynti. Ki briew jong ka kynhun NDRF ki dang pyrshang ban poi sha kitei ki jaka.” u la ong.
Ïa mynta u Myntri Rangbah ka Kerala u Pinarayi Vijayan u la ong ha ka Facebook ba ar tylli ki helicopter jong ka Air Force ki la leit sha Wayanad na Sulur ban ïasohktilang ha ka ban ai jingïarap bad pyllait im ïa ki nongshong shnong.
U Myntri Rangbahduh u Narendra Modi ha ka sngi Ba-ar u la pynpaw ïa ka jingsngewsih kaba khraw halor ka jingduh noh ki mynsiem briew na ki jingtwa khyndew. Ki la don kumba 19 ngut ki briew kiba la ïap katba palat 100 ngut la suba ba ki la shah tep ha ki jingtwa.
Ha ka jingpyllait khubor lyngba ka rynsan X, u Myntri Rangbahduh u la ong ba u la pynthikna ïa u Myntri Rangbah ka Kerala u Pinarayi Vijayan na ka bynta baroh ki jingïarap na ka sorkar kmie na ka bynta ban kyrshan bad weng ïa kane ka jingeh.
U la pynbna ruh ïa ka jingïarap pisa kaba T. 2 lak sha ki longïing jong kito kiba la ïap ha ka jingjia bad ïa kiba la mynsaw na kine ki jingjia u la pynbna ban ai mar T. 50 hajar.
U Myntri Rangbahduh u la bthah ïa u president ka seng BJP u J P Nadda ba un pyntreikam ïa ki nongbud ka seng ha kane ka thaiñ ban ai ka jingïarap bad ïasnohktilang ha kane ka kam na ka bynta ban ai jingkyrshan sha ki lanot.
Katkum ka jingïathuh jong ki bor pynïaid distrik, la ong ba ki la don kumba katto katne tylli ki longïing kiba la shah pynkynriah jaka sha kiba bun ki jaka sah ba shipor bad sha ki ïing jong ki bahaïing hasem jong ki hadien ba kim don jaka sah shuh namar ka jingtwa khyndew.
Kumba la ïathuh ka tyllong khubor, la ong ba ki la don haduh 400 tylli ki longïing kiba la sahkut ha katei ka thaiñ hadien ba ka jingkieng kaba don hajan Chooral Mala Town ka la twa bad hap noh.
Ka la ong tang kane hi ka jingkieng kaba long ka lynti ban leit sha kane ka shnong. Ha kajuh ka por la ïathuh ba ki la don kumba ar tylli ki helicopter na Sulur Air Force Station ki la don bynta ban kit ïa ki lanot na Wayanad, bad ar tylli ki kynhun na ka Kannur Defence Security Corps ruh ki dang don bynta ban ai jingïarap ïa ki nongshong shnong.
