New Delhi, Naitung:
Ki la don 2 ngut ki briew kiba la ïap bad 20 ngut ki nongleit jingleit ki la mynsaw ha ka por ba 18 tylli ki bynta ba la phiah jong ka rel 12810 Howara-CSMT Express ki la kylla bad julor ha ka lynti rel kaba don hapdeng ka shnong Rajkharsawan bad Badabambo kiba don ha Jharkhand Chakradharpur distrik ha ka jingjia kaba la jia hynnin ka step.
Kane ka jingjia ka la jia ha ka por 3:45 mynstep jong ka sngi Ba-ar hajan Barabamboo ka jaka kaba jngai kumba 80 km na Jamshedpur kaba hap hapoh ka Chakradharpur Division jong ka South Eastern Railway (SER).
Haba la ïoh jingtip halor kane ka jingjia, ki kynhun pyllait im ki la don bynta ban ïarap pyllait im bad sei ïa ki briew na kane ka rel bad ka kynhun jong ka NDRF ruh ka la don bynta ban ai jingïarap bad pyllait im ïa ki nongleit jingleit ha kaba ka dang bteng haduh ba la thoh ïa ka khubor,” la ong u DC jong ka West Singhbhum u Kuldeep Chaudhary uba la leit jurip bad don ha katei ka jaka ba la jia ka jingjia basngewsih ha ka jingïakren bad ki nongthoh khubor.
Kane ka jaka ba la jia kane ka jingjia ka dei kaba don ha ka khappud kaba don hapdeng ka West Singhbhum bad ka Seraikela-Kharsawan distrik.
Katkum ka kaiphod ba la ïohlum nyngkong ba la ïasam da ki heh nongpynïaid jong ka tnat Railway, la ong ba kane ka jingjia ka la ktah jur bad pynthut ïa ka jingïaid lynti jong ki rel na Howrah-Mumbai.
Ka SER ka la pynsangeh noh ïa ki katto katne tylli kii rel Express bad ki Passenger Express ha ka Sngi Ba-ar, kynthup ïa ka 22861 Howrah-Titlagarh-Kantabanji Ispat Express bad 12021 Howrah-Barbil Janshatabdi Express.
Ki heh ba dei khmih jong ka tnat Railway ki la hiar mar mar sha kitei ki jaka ha ryngkat ka Railway Medical van bad ban pynpoi kiwei kiwei ki lad pynlait im ïa ki briew kiba ngat ha kane ka apot.
