Thiruvananthapuram, Naitung:
Hadien ba wan lynshop ka shlei um bad twa khyndew kiba la ktah jur ïa ka Wayanad, u Myntri Rangbah jong ka Tamil Nadu u MK Stalin ha ka Sngi Ba-ar u la pynbna ka jingïarap pisa `. 5 klur sha ka sorkar Kerala. Nalor kane la ong ba ki la don arngut ki heh IAS ophisar jong ka Tamil Nadu kiba la shah thung ha ka bynta ban ai jingïarap ha kaba ïadei bad ki jingpyntreikam ban pyllait im bad ban ai jingïarap ïa ki lanot kiba la ïakynduh jingeh.
U Stalin u la ïakren bad u Myntri Rangbah jong ka Kerala u Pinarayi Vijayan lyngba ka Phone ha ka sngi Ba-ar bad u la pyntikna ïa u ba un ai ka jingïarap ha ka ban pyllait im bad ban ïarap ïa ki lanot. Kumba la sakhi, la ong ba ki dang don da ki spah ngut ki briew kiba dang shah ktah na ki jingtwa khyndew.
La dep ban thaw ïa ka kynhun jong ki nongpyllait im kaba kynthup ïa 20 ngut ki pulit pyllip ding hapoh ka jingïalam jong u Deputy Director, ka kynhun jong ki 20 ngut ki dkhot jong ka kynhun State Disaster Response Force (SDRF) bad jong ki 10 ngut ki dkhot jong ka Medical. Kine ki kynhun pyllait im bad ki kynhun ai jingïarap ki la don mynta ha Wayanad. U Stalin u la pynpaw ka jingsngewsih halor kane ka jingjia, u la pyntikna ban nang bteng ha ka ban ai jingïarap bad jingkyrshan sha kiba donkam ha kane ka jylla ha kum kane ka por ba ki ïakynduh ïa ka jingeh kaba khraw.
