New Delhi, Nailar:
Ki liengsuiñ ïapom jong ka IAF kiba ïashim bynta ha ki jingpynher kin kynthup ïa ki liengsuiñ Rafales, Sukhoi-30 MKI, Mirage 2000s, Jaguars bad ki MiG-29. Ka Tarang Shakti 24, kaba dei ka jingïalehkai bad ka jingpyni ïa ki sap jong ki rukom pynher ha suiñ kaba heh tam ban pynlong da ka India, kan long ha une u bnai Nailar-Nailur, bad pynrung 10 tylli ki shipai suiñ bar ri bad 18 tylli ki ri kum ki nongpeitkai.
Kane ka jingpynher kan ailad ïa ka ri ban pyni ïa ki sap tynrai jong ki shipai jong ka sha ka pyrthei, ong u Air Marshal u A.P. Sing. Kane ka jingpynher kan long ha ki ar bynta: naduh ka 6-14 tarik u Nailar ha Sulur Air base ha Tamil Nadu, bad ha ka 29 tarik u Nailar haduh ka 14 tarik Nailur ha Jodhpur. Ha kawei pa kawei ka bynta kan don ka jingïashim bynta jong ki 70-80 tylli ki liengsuiñ, kynthup ïa ki liengsuiñ ïapom, ki liengsuiñ helikopter, ki liengsuiñ ba kyrpang, ki liengsuiñ thep umphniang ha suiñ bad ki liengsuiñ kiba pyntip ïa kane ka kam, la ong ki heh shipai jong ka tnat IAF. “Kawei na ki thong ka long ban pyni ïa ka jinglong jingman jong ka ri trai muluk kaba dang kiew bha bad ban pynpaw ïa ka jingthmu ban shaniah halade. Ka liengsuiñ ïaleh kaba rit jong ka Tejas (LCA Mk-1), ka liengsuiñ ïaleh barit jong ka Prachand, ka liengsuiñ ïaleh jong ka Dhruv bad ka liengsuiñ ba la shna da ki tiar ïaleh jong ka, ka Rudra, ki dei napdeng ki tiar ba la pynmih ha ka thaiñ kiba ïashim bynta ha ki jingpynher,” la ong u Singh.
Ki la don kumba katto katne tylli ki liengsuiñ khaïi kiba la hap ban shah pynsangeh treikam namar ka jingdon jong kane ka jingpynher ïa kine ki liengsuiñ ïapom, la ïathuh ka tyllong khubor. Ka Tarang Shakti 24 kan kynthup ïa ka jingwanrah ïa ki jait rukom pynher bapher bapher ha ka jinglong kaba shisha, kan kyntiew ïa ka jingshaniah para ma ki bad ïarap ban wad ïa ki lad ki lynti na ka bynta ka jingïatreilang bad ban shim ïa ki rukom treikam kiba bha tam markylliang, la ong u Singh. Ban pyntikna, katba ka Tarang Shakti kan dei ka jingïalehkai ba bun rukom kaba heh tam ban pynlong ha India, ka IAF ka la ïashim bynta ha ki katto katne ki jingïalehkai kiba kum kine shabar ri.
